HB vant burtur úr EB/Streymi

EFFODEILDIN - 23. UMFAR:

Tað gjørdist als ikki so spennandi í Gundadali, sum roknast kundi við áðrenn dysturin byrjaði. Undan dystinum hevði HB spælt tveir dystir javnar og tapt ein, hinvegin hevði EB/Streymur vunnið báðar sínar seinastu dystir stórt og tapt tann triðseinasta tepurt.

Mátin, sum sigrarnir hjá EB/Streymi eru komnir til høldar uppá, hevði eisini við sær, at ein útisigur var rættiliga sannlíkur í Gundadali. Undan dystinum, altso.

Tí tá liðini fóru á vøllin vísti tað seg, at HB veruliga hevði fatur á langa endanum, og tá dysturin var liðugur, hevði oddaliðið vunnið við fýra málum móti ongum á føroyameistarunum, sum leggja frá sær um skamma stund.

Úrslitið hevur við sær, at HB í kvøld kann fara út á Argir við teirri vitan, at vinna teir útsetta dystin móti AB, eru teir átta stig fremstir, og tað eru bara 12 stig eftir at spæla um. Gamaní er dysturin móti ÍF eftir, men hann kemur ikki fyrr enn ÍF hevur spælt móti Víkingi, og tá kann meistaraheitið í roynd og veru longu vera avgjørt. Um Víkingur vinnur á ÍF og HB vinnur á 07 Vestri. Og AB í kvøld.

Umframt at staðfest, at HB framvegis er greitt oddalið, hevði úrslitið í Gundadali við sær, at seinasta vónin hjá EB/Streymi at endurvinna meistaraheitið hvarv. Liðið er nú so langt aftanfyri HB, at sjálvt tey allar, allar mest bjartskygdu nú síggja at tað ber ikki til.

Annars er tað í botninum, at stóri spenningurin er.

AB kláraði við sigrinum móti Víkingi nokk at bjarga sær uppá turt, og tað er flott klárað, tá hugsað verður um umstøðurnar í seinastuni og, at liðið fyri kortum lá aftast í kappingini. Við 25 stigum er tað øgiliga ósannlíkt, at AB flytir niður.

Hinvegin er tað púra opið, um tað verður TB ella KÍ, sum flytir niður saman við 07 Vestri. KÍ hevur verið í stríðum andróðri síðan einaferð í apríl, og tað tykist sum er tað meira ella minni fullkomiliga líkamikið, hvat liðið ger, úrslitið er tað sama.

TB er tó lítið mætari beint nú, men har er stórur spenningur, tí tað eru bara tvey stig á muni. Tí skal so øgiliga lítið til fyri at TB fer framum KÍ og sendir stoltleika norðoyinga á niðurflytingarkós. Tað kundi hent í 23. umfari, tá KÍ tapti móti B36, men TB tapti eisini, hesaferð stórt á heimavølli. Tað kann henda um vikuskiftið, tá TB hittir AB, men tað fer so eisini at vera seinasta útkall hjá TB, tí liðið hevur B36, HB og Víking eftir aftaná tað. Og tað er ikki lættasta skrá hjá einum liði, sum er undir trýsti. Skráin hjá KÍ er eitt sindur lættari, tí klaksvíkingar hava AB, Víking og 07 Vestur sum teir tríggjar seinastu.

Tað stutta av tí langa er tó, at spenningurin í botninum er størri enn spenningurin í oddanum, og tað verður øgiliga áhugavert at fylgja við, hvussu leikur fer næstu vikurnar.

Næstu dystirnir í Effodeildini vera spældir um vikuskiftið, og tá sær skráin soleiðis út. Lagt verður til brots í Klaksvík leygardagin: