ÍF misti á stokkinum

EFFODEILDIN - 18. UMFAR:

Nú skal vilja ómetaliga illa til, um HB ikki skal gerast føroyameistari í mansfótbólti í ár.

Eftir 18. umfar er liðið nú tíggju stig frammanfyri ÍF, sum í allarseinastu minuttunum móti NSÍ misti alt á gólvið. Tað hevði við sær, at lítla takið, sum fuglfirðingar høvdu á havnarmonnum, gjørdist enn minni.

Enn eru 27 stig eftir at spæla um, og tí ber til hjá fuglfirðingum at fáa HB aftur, men tað er øgiliga ósannlíkt.

Næsta liðið á listanum er EB/Streymur, sum eftir ósigurin móti B36 í Havn nú er 18 stig aftanfyri oddaliðið. Tí eru allar vónir – eisini tær allar, allar bjartastu – sløktar fyri í ár. Hjá EB/Streymi snýr tað seg nú um at koma so langt í steypakappingini, har seinnu hálvfinalurnar vera spældar í kvøld, mikukvøldið 7. august.

Annars eru tað hvørki HB, ÍF ella EB/Streymur, sum er søgan í hesum døgum. Hana finna vit úti á Argjum, har AB er farið undir eina bjargingarætlan, sum ikki áður er sædd, síðan farið var at spæla 27 umfør í bestu fótbóltsdeildini.

AB fekk ikki sín fyrsta sigur fyrr enn í 12. umfari, og var tað langt frá nøkrum, sum líktist nakrari bjarging. Eftir 11 tey fyrstu umførini høvdu argjamenn bara fingið tvey stig, men nú 18. umfør eru leikt, eru argjamenn skrásettir fyri 21 stig. Tað vil siga, at uppflytararnir hava fingið 19 stig í teimum seinastu sjey dystunum. So góð hagtøl hevur einki annað felag í landinum. Sjálvt ikki oddaliðið HB, sum bara hevur fingið 16 stig hetta sama tíðarskeiðið.

Hagtølini, sum eru at finna á hesum síðum, siga, at tað ongantíð áður er hent, at eitt lið, sum hevur verið fýra stig aftanfyri nummar átta, tá 15 umfør vóru leikt, hevur bjargað sær. Nú er sjálvandi ov tíðliga at siga nakað endaligt um tað, men tað er øgiliga nógv sum bendir á, at AB er væl á veg at mótprógvað hesi hagtøl.

Sum støðan er í løtuni, eru KÍ og TB tey bæði liðini, sum skulu stríðast fyri at sleppa undan niðurflyting. At TB er endað har, er kanska ikki óvæntað, tí liðið broyttist nógv fram móti hesum kappingarárinum. Hinvegin fingu teir gongd á beinanvegin, tá kappingin byrjaði, og tað gav eitt sindur av luft. Nú er stígur tó komin í  og TB er endað í niðurflytingarstríðnum, sum liðið eisini var partur av í fjør.

Hjá KÍ stendur tó verri til. Liðið hevur ikki vunnið í langsamiligar tíðir, og liggur nú bara trý stig frá næstaftasta plássi. Tað er ikki ynskistøðan hjá KÍ, og tað er eisini væl verri enn mett var frammanundan. KÍ var ikki besta boðið uppá eitt oddalið í ár, men tað mundi vera fáur sum roknaði við, at liðið skuldi stríðast fyri lívinum í ár. Men tað er soleiðis, sum støðan er blivin.

Næsta umfar, sum er tað seinasta áðrenn landsdystin móti Íslandi hálvan august, verður spælt soleiðis: