Spenningurin er í botninum

2. deild menn ,16 umfar
KÍ - ÍF  10-1
B68 - Royn  2-1
TB - FC Suðuroy  2-3
Undrið - FC Hoyvík  9-3
B36 - AB  4-1

Støðan og fleiri hagtøl frá dystunum síggjast her.

Oddaliðið í 2. deild, KÍ, lat ongan iva vera um, at teir ikki bara ætla sær at flyta upp í ár, men at teir so sanniliga eisini ætla sær at vinna gullið í deildini, tá ÍF var á vitjan við Djúpumýrar leygardagin. Í nærum ein hálvleik kláraði illa sperda ÍF at halda tørn, men so skoraði KÍ tvey skjót mál áðrenn hálvleik, og so var liðugt. Ímillum tey 8 málini, sum KÍ fekk afturat í seinna hálvleiki, svaraði sjálvur formaðurin í ÍF aftur við einum máli.

B68 gjørdi sína skyldu á Toftum og hálaði ein 2-1 sigur í hús móti hvalbingum, meðan Undrið loksins vanna sær trý stig aftur, tá longu niðurflutta FC Hoyvík enn einaferð ognaðu sær eitt stórtap. Í Hvalba gjørdu tvørámenn tað lort fyri seg sjálvar og møguleikan at yvirliva í 2. deild í ár við at tapa 2-3 fyri FC Suðuroy, meðan AB framvegis er besta boðið upp á hitt niðurflytingarliðið eftir eitt greitt 4-1 tap fyri B36 í Gundadali.

Meðan kappingini í toppinum ikki er so spennandi longur, so er veruligur eldur í botninum. FC Hoyvík er langt síðani flutt niður, men enn er einki avgjørt um, hvør skal niður í 3. deild saman við teimum. AB liggur framvegis undir strikuni, men stutt er upp til bjargingina. Komandi dysturin hjá ÍF á heimavølli móti TB verður eftir øllum at døma rættuliga avgerandi fyri lagnuna hjá báðum hesum liðum í 2. deild í ár, tí bæði ÍF og TB hava truplar dystir eftir í 18. og seinasta umfari, meðan AB á pappírinum hevur ein rímuliga góðan møguleika at fáa trý stig til hølvdar í seinasta dysti sínum móti FC Hoyvík í Gundadali.

ES (15. september)
Í dag boðar FSF frá, at FC Hoyvík hevur tikið lið sítt úr kappingini og sambært kappingarreglunum tapa teir tískil báðar eftirverandi dystirnar móti Royn og AB 3-0. Hetta merkir, at Royn við sínum nú 21 stigum eru heilt tryggir í 2. deild, og at AB við sínum nú 18 stigum fer framum bæði ÍF og TB við sínum 16 stigum í part. Ein keðilig hending fyri allar partar sum enn einaferð setur stórt spurnaðartekin við núverandi kappingarreglur.

Komandi umfar, 17-18. september
B36 - FC Suðuroy (útsettur dystur) 16/9
ÍF - TB
Royn - FC Hoyvík  3-0 Royn vinnur uttan dyst, tí FC Hoyvík hevur tikið seg úr kappingini.
FC Suðuroy - B36
KÍ - Undrið
AB - B68