Toppliðini vinna, hini megna lítið

mánadagur 22. august 2011
Vodafonedeildin, 18. umfar: B36, Víkingur og EB/Streymur leggja hini liðini alt longur afturum, NSÍ er framvegis einsamalt í ongamannalandi, meðan øll hini liðini hava sera trupult við at skava stig saman

Vælkomin til FaroeSoccer á facebook

Regin Sivertsen

Vodafonedeildin, 18. umfar
ÍF - Víkingur  1-2
B36 - NSÍ  4-3
B68 - 07 Vestur  1-1
KÍ - HB  2-2
B71 - EB/Streymur  1-2

Støðan og fleiri hagtøl frá dystunum síggjast her. 

Nú tveir triðingar av kappingini eru farnir afturum má sannast, at nærum hvør dystur er sum ein finala hjá øllum liðum.

Liðini, sum møttust í Fuglafirði hava havt tvær heilt ymiskar lagnur í ár. Ímeðan ÍF berjist fyri yvirliva, so er Víkingur ein seriøsur kappingarneyti til føroyameistaraheiti saman við B36 og EB/Streymi. Fyri ÍF var tað ein dyggur smeitur, at Jákup Mikkelsen noyddist út við skaða tíðliga í fyrra hálvleiki. Víkingur vann dystin 2-1 og heldur harvið fast um annaðplássið, meðan ÍF enn liggur á niðurflytingarplássinum.

Málríkur dystur var í Gundadali, tá ið NSÍ vitjaði oddaliðið B36. Runavíkingar vóru á odda bæði 2-0 og 3-2, men í røttum føroyameistarastíli (hóast ikki sannførandi spæl) svaraði B36 aftur og vann loksins dystin 4-3. Við sigrinum heldur B36 fast um oddasessin og stevna framhaldandi beint eftir einum føroyameistaraheiti. Víkngur er tó beint í hølunum á havnarmonnunum.

B68 tók ímóti 07 Vestur á Svangaskarði. Dysturin endaði við javnleiki. Ein javnleikur, sum bæði liðini mugu iðra seg eitt sindur um, tí undan dystinum hevði eingin av kappingarneytunum í botninum á stigatalvuni megna at vunnið.

Arvafíggindarnir KÍ og HB hittust við Djúpumýru sunnudagin. Bæði liðini berjast um at yvirliva í deildini, dysturin endaði 2-2, og sum vera man, vóru tað havnarmenninir, sum vóru fegnast um úrslitið, tí málið til 2-2 varð seinasta sparkið í dystinum, og var tað eingin annar enn sjálvur blaðungi HB-málverjin og klaksvíkingurin, Teitur M. Gestsson, sum skeyt málið eftir hornaspark.

Sandoyingar eru komnir fyri seg eftir laka byrjan uppá kappingarárið. Aftur hesuferð var ringt at vinna á teimum inni í Dal, men EB/Streymur slóð aftur til í seinastu løtu, ein eginleiki sum topplið ofta hava. Súrt fyri B71, men sæð yvir allan dystin var EB/Streymur væl betra liðið.

Komandi umfar
Víkingur - B36
ÍF - KÍ
HB - B71
EB/Streymur - 07 Vestur
NSÍ - B68

  

Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til hesar kappingar, sum FaroeSoccer skrásetur:

Betri Deildin M/K, 1. deild menn, 2. deild menn, U21 menn, 1. deild kvinnur og Steypakappingarnar M/K.

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til [email protected].