Toftamenn nærkast 1. deild aftur

2. deild menn, 13. umfar
B68 - B36  1-0
Royn - KÍ  2-4
FC Suðuroy - Undrið  1-1
FC Hoyvík - TB  0-3 uttan dyst
AB - ÍF  1-1

Støðan og fleiri hagtøl frá dystunum síggjast her.

Aftaná 9 sigrar á rað, fekk KÍ, avgjørda oddaliðið í 2. deild, ein lítlan niðurtúr herfyri, tá teir settu stig til í tveimum dystum, men seinastu tveir dystirnar sær út, sum teir hava fingið fatur á rætta endanum aftur. Hvalbingar hava verið drúgvir á heimavølli í ár, men hesi hagtølini løgdu teir í KÍ einki í og vunnu ein tryggan 4-2 sigur. Seks gul kort og trý(!) reyð kort vórðu givin í dystinum, og tá tvey av teimum reyðu fullu til Royn, gjørdi hetta uttan iva uppgávuna lættari hjá oddaliðnum.

Toftamenn gjørdu sær sjálvum og sínum uppflytingarmøguleika eina risatænastu við at vinna á B36 á Toftum. Sambært b68.fo høvdu báðir teir leikandi venjararnir beinleiðis ávirkan á úrslitið. B36-venjarin, John N. Thomsen, kom inn seint í dystinum, og hann gjørdi frísparkið í næstseinasta minutti, sum leikandi venjarin hjá B68, Øssur Hansen, skoraði uppá.

Bæði oddaliðini, KÍ og B68, tykjast á pappírinum at hava tað lættastu skránna eftir, og mugu tískil metast sum stórfavorittar at flyta upp í 1. deild komandi ár.

FC Suðuroy og Undrið gjørdu tað ringt fyri seg sjálvar (les: uppflytingarmøguleikan) at spæla javnt í Vági. Í málinum hjá FC Suðuroy var veteranurin FCS-formaðurin, Bjarni Johansen, aftur at síggja.

Fuglfirðingar lógu til at tapa á Argjum, men fingu at enda ein góðan javnleik, sum heldur teimum frammanfyri AB í niðurflytingarstríðnum. Hetta stigið hevði ikki minni týdning alla ta tíð, at TB fekk trý ókeypis stig móti FC Hoyvík, sum heldur ikki møtti upp til seinna dystin millum hesi bæði liðini í ár. FC Hoyvík man nú verða rættuliga tætt upp á at verða tveittir úr 2. deild.

Mest áhugaverdi dysturin í komandi umfar er at síggja til dysturin í Gundadali millum Undrið og B68. Vinnur Undrið ikki hendan dystin, kunnu teir nokk endaliga avskrivast sum uppflytingarevni í ár.

Komandi umfar, 27. august
B36 - FC Hoyvík
Undrið - B68
KÍ - AB
TB - Royn
ÍF -FC Suðuroy