KÍ gjørdi slætt borð eftir 25 sekund!

Hagtøl frá steypafinaluni síggjast her.

Nýggja graslíki á vøllinum við Djúpumýrar í Klaksvík varð alment tikið í nýtslu í steypafinaluni hjá kvinnum millum KÍ og AB. 

AB byrjaði dystin og fór beint í álop, KÍ vann bóltin í egnum brotsteigi, spældi skjótt fram í høgra borð, har Rannvá B. Andreasen legði innfyri til Mariu K. Thomsen, og so var mál. Lítil hálvur minuttur farin, og dysturin var í roynd og veru avgjørdur.

Liðini hava spælt nógvar tættar dystir seinnu árini, men í dag skuldi vera øðrvísi. Tað sást beinavegin, at KÍ-kvinnurnar vóru nógv meira tendraðar enn AB-kvinnurnar, tí tær bláu vunnu snøgt sagt allar dystir á miðjuni, har gestirnir virkaðu alt ov skeivt plaseraðir til tíðir. Tá AB endiliga fekk sent bóltin frameftir, var tað vónleyst hjá eini púra einsamallari Monu Breckmann at fáa nakað burturúr móti superroyndu KÍ-miðverjuni, Báru S. Klakstein og Malenu Josephsen.

Um fyrra hálvleik er at siga, at KÍ heilt einfalt spældi fyri sigrinum, meðan AB hálvgum bara tyktist vera við fyri at vera við og at fáa dystin avgreiddan skjótast tilbar, tí lítið og einki riggaði hjá teimum uttan málverjin, Simona Heinesen.

Hvørji boð eru komin í hálvleikinum frá AB-venjaranum, Lennard Petersen, vita vit ikki, men munurin á fyrra og seinna hálvleiki var sum nátt og dagur. Áskoðararnir hjá AB góvu dyggan stuðul, og argjakvinnur byrjaðu at yvirtaka spælið. Hetta gjørdi tað bleiv meira undirhaldandi hjá teimum mongu áskoðarunum, sum vóru møttir til dystin.

KÍ hevði annars tamarhald á dystinum meginpartin av tíðini, og havnargentan í KÍ-málinum, Randi Wardum, mátti teljast millum kaldastu leikararnar á vøllinum, tí fyrstu ferð hon nært bóltin eftir eitt skot frá mótstøðulinum var eftir góðar 60 minuttir. Hjá KÍ manglaði Suffía Purkhús, meðan AB manglaði Lisu í Liða.

Samanumtikið vísti KÍ enn einaferð, hvussu týdingarmiklir dystir skulu taklast, og steypafinalan í ár gjørdist einki undantak. Tað nyttar einki bara at hava bóltin, um man einki ger við hann, hetta hevur AB longu roynt fleiri ferðir móti KÍ. Alt í alt ein uppiborin sigur, og FaroeSoccer ynskir KÍ hjartaliga tillukku.