Trongligt í oddinum

Regin Sivertsen 

1. deild menn, 13. umfar
EB/Streymur - FC Hoyvík 1-4
NSÍ - TB 1-2
FC Suðuroy - Skála 2-2
AB - Víkingur 3-0
HB - 07 Vestur 5-1

Støðan og fleiri hagtøl frá dystunum síggjast her.

Teir næstbestu hjá EB/Streymi fingu eina flúgvandi byrjan upp á kappingina í ár, men seinastu nógvu umførini hevur verið meira soltið hjá sundalagsmonnum, sum nú alsamt nærkast vandaøkinum. Fyri FC Hoyvík var sigurin ímóti EB/Streymi øgiliga týdningarmikil, tí við hesum stigunum halda teir enn fast í liðunum, sum berjast um at sleppa undan niðurflyting. Ein frálík byrjan hjá Súna Fríða Barbá, sum stóð fyrstu royndina sum venjari hjá FC Hoyvík.

Annað lið hjá NSÍ hevur havt eitt frálíkt kappingarár higartil, men teir hava havt trupulleikar við absoluttu toppliðunum, og dysturin móti TB gjørdist einki undantak. Tvørámenn tykjast yvirhøvur stabilari og sterkari á útivølli í ár, og tað kann í síðsta enda gerast munurin millum leygardags- ella sunnudagsfótbólt.

FC Suðuroy mistu tvey stig, tá ið Skála var á vitjan. Hóast FC Suðuroy skoraði ógvuliga seint í dystinum, so var væntandi at liðið á fyrsta plássinum megnaði at vinna móti Skála á heimavølli. Men Eliesar J. Olsen hevði blandað kortini rætt til dystin og fór norðaftur við skálamonnum og einum kærkomnum stigi í skjáttuni – hóast tað var so sera nær við at vera øll trý.

AB vann 3-0 ímóti Víkingi á Argjum. Dysturin sýndist at vera javnur í fyrra hálvleiki, men eftir hálvleikin vóru argjamenn avgjørdir og vunnu dystin 3-0. Slíkir dystir skulu bara vinnast, og í so máta gjørdu argjamenn sína skyldu.

Vit hava nevnt tað ofta fyrr, at uppflytarin 07 Vestur er á veg retur aftur í 2. deild, og nýggi fyribilsvenjarin, Birgir Joensen, fekk ikki broytt upp á hendan veruleikan móti einum øðrum botnliði, HB, í Gundadali. Her var stórur munur millum teir ungu vágamenninar og ungu havnarmenninar. Ein týdningarmikil og neyðugu sigur hjá næstbestu HBarunum, sum sluppu sær upp um strikuna aftur.

Næsta umfar hava bæði AB og TB kjans at fara framum FC Suðuroy á stigatalvuni, um tey vinna sínar dystir (nóg nógv). Hetta tí FC Suðuroy longu hevur leikað sín dyst í 14. umfari, tann dysturin varð framskundaður til 10. juni. 

Komandi umfar, 23-25. juni
FC Suðuroy - EB/Streymur 4-1 (leiktur 10 juni)
FC Hoyík - 07 Vestur
TB - Skála
AB - HB
Víkingur - NSÍ