AB og KÍ í steypafinaluni

Pætur E. Rasmussen

Steypakappingin kvinnur, seinna hálvfinala
AB - Skála 1-0 (0-0)
KÍ - Víkingur 6-3 (1-0)

Fleiri hagtøl frá dystunum síggjast her. 

Á Argjum hevði heimaliðið eina tveymálsleiðslu at verja frá fyrra dystinum, og tað var lítið, ið bendi á, at Skála fór at gera nakað við hendan veruleikan. AB byrjaði betri og hevði bóltin fyri tað mesta, men eingin serligur vandi var á ferð, fyrrenn Elin Maria Isaksen skoraði fyri AB tíðliga í seinna hálvleiki. Eftir hetta royndu gestirnir at leggja trýst á, men verjan hjá heimaliðnum hevði rímuliga gott tamarhald á støðuni hvørjaferð. AB var í veruleikanum tættari at koma uppá 2-0 enn Skálakvinnur at koma uppá javnt. Argjakvinnur vóru favorittar og vunnu sum væntað, og tað er eisini í lagið, at tær eru annað liðið í finaluni.

Við eini leiðslu uppá 12 mál skuldi ein kanska væntað, at KÍ fór at geva teimum yngru leikarunum nakað av leiktíð, men so var ikki. Einasti fasti leikarin, sum KÍ manglaði, var Rannvá Andreassen, sum er uttanlands. Eins og tann fyrri dysturin skuldi hesin vísa seg at verða málríkur, tí ikki færri enn níggju mál komu. Palma Ryggshamar, ið hevur vart málið hjá Víkingi meginpartin av árinum, hevur brotið fingurin, og verður nokk ikki at síggja á liðnum aftur í ár, meðan hin málverjin, Nina Davidsen, hevur ein smærri fótskaða at dragast við. Við báðum málverjunum úti, hevði venjarin hjá Víkingi, Ingun Hansen, blandað kortini soleiðis, at Bjørg Jarnskor, sum vanliga er at finna í verjuni ella miðjuni, var sett í málið. Unga Maria K. Thomsen hjá KÍ gjørdist dagsins leikari við sínum hattrikki.

Lagt er upp til eina spennandi finalu hósdagin 4. august, tá liðini, sum møttust í finaluni í 2009, bresta saman aftur. Sum sæst á yvirlitinum niðanfyri (lands- og steypakapping) hevur KÍ verið greitt omaná í seinastu 12 innanhýsis uppgerðum, men seinast liðini møttust í eini finalu, var AB omaná, og tær ferðirnar, liðini hava leikt fjórða dagin í einum mánaða, er AB eisini farin av vølinum sum vinnari. Um KÍ heldur fast um góðu gongdina, ella um AB livir upp til at tað er 4. august, tá finalan skal leikast, verður spennandi at síggja. Finalan verður leikað á (allarhelst) nýggja graslíkinum í Klaksvík.

KÍ - AB  5 - 3  22/5-11
AB - KÍ  1 - 1  25/4-11
AB - KÍ  0 - 0  22/9-10
KÍ - AB  3 - 3  27/6-10
AB - KÍ  1 - 3  24/5-10
KÍ - AB  3 - 1  30/4-10
KÍ - AB  3 - 0    6/4-10
AB - KÍ  0 - 4  27/9-09
KÍ - AB  1 - 2    4/7-09
KÍ - AB  1 - 0  28/6-09
AB - KÍ  1 - 1  24/5-09
KÍ - AB  0 - 1    4/5-09

Lið  D - V - J - T - VM - TM - S
KÍ  12 - 6 - 4 - 2 - 25 - 13 - 22
AB 12 - 2 - 4 - 6 - 13 - 25 - 10