Pætur E. Rasmussen
1. deild kvinnur, 8. umfar
AB - Skála 6-1 (0-1)
B36 - HB 3-1 (1-0)
Víkingur - KÍ 1-4 (0-2)
Støðan og fleiri hagtøl frá dystunum síggjast her.
Á Argjum vóru skálakvinnur á vitjan. Undan dystarbyrjan mátti metast, at hetta fór at vera ein tættur dystur, men so var ikki. AB var vandameira liðið, men móti leikgongdini fær Skála mál. Eftir at Skála hevði havt horna, hevði Doris í Garði havt hondina á bóltinum í egnum brotsteigi, og Birna T. Johannesen setti bóltin trygt í netið. AB-liðið var sum hamskift í seinna hálvleiki. Doris í Garði, sum fekk eitt blátt hovið eyga í yvirtíðini í fyrra hálvleiki, varð avloyst av Lisu í Liða, sum er ein meira framrættaður leikari, og hetta vísti seg at bøta um álopspartin hjá heimaliðnum. AB legði beinaveg trýst á og javnaði skjótt við máli frá Ásleyg Súnadóttir, og lítla løtu seinni øktu Elsa S. Jacobsen og Mona Breckmann. Miðskeiðis í seinna hálvleiki fellir Mirjam H. Johansen Monu í kriminella økinum. Hesum tekur Simona Heinesen sær av, men misnýtir, tó er hon fyrst á returinum og so er 4-1. Bara fáa minuttir eftir hetta fellir Mirjam aftur Monu í brotssteiginum, og Simona tekur aftur brotssparkið, og hóast Sólfríð Christiansen hjá Skála aftur fer rætta vegin og fær hondina á, so fer bólturin í málið. Ásleyg Súnadóttir, sum byrjaði málveitsluna, endar hana eisini við at seta eitt langskot í málið til 6-1.
Í Gundadali var grannauppgerð millum B36 og HB. Heimaliðið, sum undan dystinum mátti metast sum favorittur, livdi eisini upp til tað. Fyrstu løtuna var tað einvegis ferðsla móti HB málinum, og tað var bara ein spurningur um tíð, áðrenn fyrsta málið kom. Liðskiparin hjá B36, Anja Maria Weyhe, sum man vera mest royndi leikarin á liðnum, skoraði til 1-0 eftir stórt korter. Birita Mortansdóttir, sum skifti frá HB til B36 áðrenn kappingin byrjaði, setti bóltin í netið til 2-0 í seinna hálvleiki, og Margit Magnusdóttir økti til 3-0 lítla løtu seinni. Móti endanum fekk Marianna H. Jacobsen eitt troystimál fyri HB.
Víkingur tók ímóti oddaliðnum KÍ í Sarpugerði, og her fóru gestirnir avstað við øllum. All-time toppskjúttin í kvinnufótbólti, Rannvá B. Andreasen, legði KÍ á odda í 17. minutti, og stutt áðrenn hálvleik økti Sigrid Jacobsen fyri gestirnir. Stutt inn í seinna hálvleik, kom spenningur í dystin aftur, tá Heidi Sevdal minkaði um munin, lítið korter seinni, var Sigrid tó aftur uppá spæl og gjørdi tað til 1-3. Í tíðini dómarin hevði lagt afturat, skoraði Paula Mikkelsen til endaligu støðuna 1-4.
Komandi umfar 5. juni
KÍ - Skála
AB - HB
Víkingur - B36