KÍ og B68 trumla avstað

2. Deild menn, 5. umfar
B68 - Undrið  1-0
FC Hoyvík - B36  5-5
Royn - TB  1-1
AB - KÍ  1-3
FC Suðuroy - ÍF  3-0

Støðan og hagtøl frá dystunum síggjast  her.

Klaksvíkingar vunnu sín fimta sigur á rað, tá teir vunnu ein tryggan sigur á teimum næstbestu hjá AB á Argjum. Hæddarpunktið hendan dystin má vera, at John William Joensen, 42-ára gamli málverjin og blaðstjórin á Norðlýsinum, fekk eitt rimmar come-back og spældi sum fyrsta dagin sambært KÍ-heimasíðuni. Norðlýsið hevur sum vera man eina stóra grein um hendan dystin og eini 40-50 myndir – harav eini 25 eksklusivar av málverjanum “in action”, ella tað BURDU teir kanska :-)

Toftamenn eru framvegis í hølunum á KÍ. Hesum syrgdi miðvallarin og B68-liðskiparin, Emil Ronaldsson fyri, tá hann tók ábyrgdina á seg og skoraði einasta málið í dystinum upp á brotsspark í seinna hálvleiki. Við hesum tapinum er góða gongdin hjá Undrinum steðgað nakað fyribils, men teir fara allarhelst at fáa viðhald í kæruni móti FC Suðuroy, so har eru trý stig afturat væntandi.

B36 spældi sín næsta 5-5 javnleiki í ár, aftur hesuferð móti einum “havnarliðið”, FC Hoyvík. Við sínum 20 málum fyri 5 dystir er B36 næstmest skorandi liðið í deildini, men eftirsum teir eru nærum líka gávumildir í hinum endanum, so koma ikki nóg nógv stig á kontuna – ineffektivt undirhald kundi man sagt.

Annars er eitt sindur hips um haps við úrtøkuni hjá hinum liðunum. Tað tykist, sum tað hilnast klárt betri á heimavølli enn á útivølli hjá flestum teirra. Tað er nokk vanliga søgan um, at tað stundum er trupult at manna liðini til útidystirnar. Higartil hava bæði nýggju liðini í deildini, Undrið og Royn, hildið seg omanfyri niðurflytingarstrikuna, og tað má metast sum jaligt.

ÍF fekk ongi stig í Vági móti FC Suðuroy, men flestu fuglfirðingarnir fingu tó sína profilmynd tikna og lagda út á FaroeSoccer, og TAÐ telir! :-)  Hesum syrgdi ÍF-leikarin, Grias Ellingsgaard, fyri, og FaroeSoccer takka mirðiliga fyri ómakin. Vónandi fara onnur lið at fáa sama góða hugskotið - hvør eigur ikki eitt digitalkamera í dag?

Magni á Lakjuni (B36) og Ólavur Sigurheim (Royn) eru ovast á máltindinum í 2. deild við sínum 5 málum hvør.

Komandi dystir 21. mai
Royn - B36 (umbýttur dystur vegna bygdastevnu í Hvalba)
KÍ - FC Suðuroy
TB - AB
B68 - FC Hoyvík
Undrið - ÍF