Heimaliðini vístu gestablídni

Pætur E. Rasmussen

Steypakappingin kvinnur, fjórðingsfinalur 11. mai
FC Suðuroy - AB  0-5
HB - Víkingur  1-6
B36 - KÍ  0-2
B68/NSÍ - Skála  0-1

Fleiri hagtøl frá dystunum síggjast her. 

AB, sum vitjaði í Vagi, hevði á pappírinum eina lætta uppgávu, men tað var ikki fyrrenn móti endanum, at tað bragdaði ordiliga. FC Suðuroy var væl við allan dystin, men orkan byrjaði so smátt at ganga undan, sum dysturin leið, og seinastu tíggju minuttir skoraðu gestirnir trý mál og vunnu tískil 5-0. 

HB-leikararnir, sum seinasta vikuskifti vunnu móti Skála, høvdu nokk ikki fingið armarnar niður aftur og taptu stórt móti Víkingi. HB var væl við fyrstu løtuna, men tá hálvur tími var leiktur, lótu gestirnir ongan iva vera um, hvør skuldi vinna. Tær skoraðu trý mál upp á átta minuttir, og í seinna hálvleiki brúkti tær tólv minuttir at økja frá trý til seks, HB fekk tó eitt troystimál í yvirtíðini. Marianna H. Jacobsen hjá HB fekk tvey gul kort, so hon verður ikki við móti B36 komandi dyst. 

B36 og KÍ hava spælt nakrar spennandi dystir í ár, har KÍ hevur ligið omaná, og soleiðis var aftur hesuferð. Ásla Johannesen, sum kom inn í tíðini, dómarin hevði lagt afturat, var 15 ár og 2 dagar, tá dysturin varð leiktur, og hetta sær út til at vera nýtt met fyri ein ungan leikara. 

Á Toftum var rein eysturoyaruppgerð, tá B68/NSÍ tók móti Skála. Leikliga var Skála betri, men B68/NSÍ gav Skála ein skarpan gang. Tá dysturin var av, fóru gestirnir tó við øllum. Merkisvert er, at Skála nú hevur brent brotsspark í tveimum dystum á rað, men hesuferð vunnu tær tó. Hjá gestunum var Kirstinbjørg ikki við, eftir at hon fór út við skaða móti HB, og Fríðrún, sum eisini fór út við skaða tá, kom inn, tá fáir minuttir restaðu.

Fyrru hálvfinalurnar verða 2. juni, og seinnu hálvfinalurnar verða 13. juni. Enn hevur lutakastið ikki verið.