Víkingur einsamallur vinnari

Regin Siversten

Vodafonedeildin, 4. umfar
B/Streymur - NSÍ  2-2
07 Vestur - KÍ  3-3
B68 - HB  0-0
B36 - ÍF  1-1
B71 - Víkingur  0-6

Støðan og fleiri hagtøl frá dystunum síggjast her. 

EB/Streymur kundi við sigri ímóti NSÍ leggja seg á odda í Vodafonedeildini. Fyri sundalagsmenn var tað ein dyggur smeitur, at Arnbjørn Hansen fór av vøllinum við skaða í fyrra hálvleiki. Men áðrenn hann fór út, hevði hann longu gjørt sítt, tí tað var hann sum legði EB/Streym á odda. Viðvíkjandi NSÍ var merkisvert, at nýkomni Hugues Namni ikki var við í hópinum. Um talan er um skaða ella ikki, er óvist. Men fakta er, at maðurin úr Kamerun ikki hevur verið við besta liðnum enn. Liðini bæði samdust um at býta stigini ímillum sín, og tískil misti EB/Streymur síni fyrstu stig í ár. 

Oddaliðið KÍ var vesturi í Sørvági mánadagin. Silvurvinnarin av 1. deild í fjør hevur hevur fingið eina dreymabyrjan í bestu deildini, meðan vinnarin av 1. deild í fjør, 07 Vestur, enn ikki var komin á stigatalvuna. KÍ hevði somu manning sum ímóti ÍF, meðan heimaliðið hevði fingið Sigtór Petersen aftur frá leikbanni. 19-ára gamli Henning Joensen fekk sítt fyrsta mál í Vodafonedeildini, tá ið hann legði vágamenn á odda 1-0. Men KÍ kom sterkt aftur, og legði seg á odda 2-1 beint áðrenn hálvleik. Sigast má, at stríðsvilji og ágrýtni var tað sum eyðkendi dystin, tí eftir at KÍ kom á odda 2-1, so svaraði Clayton Suares aftur við tveimum málum og legði 07 Vestur á odda 3-2. Men Kristoffur Jakobsen bjargaði KÍ undan fyrsta tapinum í ár, tá hann stutt fyri leiklok flott fluktaði bóltin í kassan.

Enn einaferð var nógvur vindur á Toftum. B68 skuldi fáa síni fyrstu stig, ímeðan HB skuldi varðveita sína sigursrøð uppá tveir dystir. Einasta hending, sum ein kann skriva um, er tá ið vágbingurin, Jón Krosslá Poulsen, fekk reytt kort fyri hevnisøku. Beint undan leiklok komu toftamenn til ein risa møguleika, men ein vælleikandi Heðin Stenberg tryggjaði havnarmonnum tað eina stigið við suðuraftur.

B36 og ÍF hittust í Gundadali mánadagin. Bæði liðini skuldu reisa seg eftir triðja umfar, har B36 mistu á stokkinum ímóti Víkingi, og ÍF tapti fyri KÍ. Dysturin var javnur, og menn vóru ágrýtnir. Heili 8 ferðir var Rúni Gaardbo í lummanum eftir tí gula kortinum. Tvey mál komu í dystinum. Klæmint Matras legði B36 á odda miðskeiðis í seinna hálvleiki, men aftursvarið frá ÍF kom bert tveir minuttir seinni, tá ið Høgni Zachariassen skallaði kærkomna javnleikin heim.

Nýggja graslíkið inni í Dal fekk av at vita mánadagin. Víkingur knúlvaðu sandoyingar heili 6-0.  Kaj Leo í Bartalsstovu gjørdi bart við sínum fyrsta hattrikki í bestu deildini. Við hesum hevur hann lagt seg á odda í kappingini um tann gylta skógvin við fýra málum. Byrjanin hjá sandingum í hesum kappingarárinum hevur snøgt sagt verið út av lagið vánalig. Leygardagin fáa teir tó ein á pappírinum góðan møguleika at ogna sær tey fyrstu stigini, tá ið B68 kemur á vitjan.

Komandi umfar 29-30. apríl
ÍF - HB
KÍ - NSÍ
B71 - B68
Víkingur - 07 Vestur
B36 - EB/Streymur