Kæruúrskurðir nú eisini á FS

FaroeSoccer kann nú bjóða mongu brúkarum sínum eina nýggja tænastu.

Á hvørjum ári koma kærur um dystir til FSF – summatíðir fleiri enn aðrar tíðir, tær flestu enda hjá Aganevndini at taka støðu til. FaroeSoccer hevur nú samlað úrskurðirnar í teimum kappingum, sum vit skráseta. Úrskurðirnir eru knýttir til hvønn einstakan dyst (sum ein reyð paragraff-ikon), men teir kunnu eisini finnast sum eitt samlað yvirlit undir YMISKT > Ymisk yvirlit > Kærumál – skjótt og lætt!

Fyribils eru kærumálini ella úrskurðirnir aftur til 2007, eini 40 í tali, men verður tað møguligt, og FSF er við upp á tað, so ætlar FaroeSoccer longur aftur í tíðina.

Vanliga eru dystir, sum eru avgjørdir við kæru, merktir við einum “K” aftanfyri ella frammanfyri úrslitið í dystaryvirlitinum (og á sjálvum dómaraseðlinum), og okkurt er eisini upplýst um hetta undir “Viðmerkingar” til dómaraseðilin.

Nú er FaroeSoccer so farið eitt stig víðari og linkar víðari til sjálvan kæruúrskurðin hjá Aganevndini (eina PDF-fílu), so kunning fæst um, hvat eitt kærumál ítøkiliga snúi seg um, og hví úrskurðurin bleiv, sum hann bleiv. Tað er valla nøkur stór avdúking at siga, at allarflestu kærurnar snúgva seg um ólógligar leikarar onkursvegna.


Dømi 1: Dystaryvirlitið – eitt kærumál í 2012 í 1. deild kvinnum.


Dømi 2: Dómaraseðilin – sami dystur sum omanfyri

Kærur er yvirhøvur av tí ónda, tí best er sjálvsagt, at dystir verða avgjørdir á vøllinum, men tað skal undirstrikast, at øll feløg hava fullan rætt at kæra sambært kappingarreglunum, og tað er altso meira reglan enn undantakið, at kærarin fær viðhald, so man kann ikki siga, at skipanin verður “misnýtt” upp á nakran máta. Tað ger neyvan heldur nakran bilsnan, at tað ongantíð er vinnandi liðið, sum kærir(!).

Tað tykist, sum kærumálini eru fækkaði seinastu árini, og hetta hevur uttan iva samband við, at FSF hevur fingið feløgini at stramma upp í sambandi við skráseting av leikarum, tvs. at spæliloyvini eru í lagi. Hetta er at fegnast um, og vónandi fer nýggja skrásetingarskipanin hjá FSF at sleppa okkum heilt av við hendan keðiliga trupulleikan. Tær flestu kærurnar eru nú í lægru deildunum, sum FaroeSoccer ikki skrásetur (enn ið hvussu so er).

Vónandi kemur nýggja tænasta okkara væl við hjá brúkarum okkara.

Vit spæla saman!