Sjónbond nú á FaroeSoccer

Brúkarar okkara hava allarhelst lagt merki til, at seinastu tíðina eru komin nøkur sjónbond á FaroeSoccer. Brotini eru at finna undir ymsu Dystaryvirlitinum undir Kappingar, og tey eru frámerkt við eini reyðari videoikon beint við síðuna av úrslitinum. Trýstir man á hesa ikonina, kemur man beinleiðis til videobrotið.



Higartil eru eini 130 sjónbond løgd út. Brotini vísa “higlights” frá aktuella dystinum, typiskt kjansir og mál, sjáldan nógv meira enn tað.

Sjónbondini eru øll tey, vit vanliga síggja á netinum, serliga á ymsu portalunum, men nógv teirra - serliga tey eldru - hava eisini longu ligið á youtube eina tíð. Tey eru so avritað og løgd í vimeogoymsluna hjá FaroeSoccer. FaroeSoccer vísir bara tey brotini, sum vit hava fingið loyvi til, tvs. at tey, ið hava tikið upp, hava givið loyvi til hetta. Brotini eru at kalla øll frá nýggjari tíð.

Tey ella teir, sum hava tikið mest upp seinastu árini, eru Rúni Dam fyri EB/Streym serliga, Hans Erik Danielsen fyri B68 og FSF og so Jóhan Thomsen fyri KÍ, men eisini fyri onnur. Fyri hvørt einasta video verður upplýst, hvør hevur tikið upp beint omanfyri brotið. Í onkrum einstøkum føri verður eisini okkurt annað upplýst. Er nakað navn komið skeivt fyri, so rætta vit sjálvsagt beinanvegin. Og er okkurt videobrot, vit ikki hava fingið loyvi at vísa, so taka vit tað sjálvsagt burtur beinanvegin (og royna at fáa neyðuga loyvið). Hetta er jú ikki nakað “business” upp á nakran máta.


Jóhan Thomsen (v.m.) úr Klaksvík er longu vorðin landskendur fyri síni mongu avbera góðu sjónbond frá føroysku fótbóltskappingini. Marni Mortensen (h.m.) fegnast vegna FaroeSoccer, at Jóhan hevur stóran áhuga fyri og hug at stuðla skrásetingararbeiði okkara, hann hevur verið sera góður at heita á í sambandi við arbeiði okkara at avrita, goyma og leggja sjónbond út - may it long continue :-)


Tað skal undirstrikast, at FaroeSoccer hevur ongan áhuga í at kappast við nakran um at vera fyrst at vísa nakað. Eitt nú hava vit eina greiða avtalu við Jóhan Thomsen og FSF um, at vit vísa ikki brotini fyrrenn nøkur umfør eru farin afturum – ella ein ávís tíð er umliðin, alt eftir hvør kapping talan er um.

Endamálið við hesum tiltakinum er fyrst og fremst at skráseta nakrar hendingar fyri eftirtíðina (eisini sum siðsøguligt virði), so tað kann finnast aftur í eini handavend, tá brúk er fyri tí – um FaroeSoccer altso hevur hetta brotið. At nógv av hesum eisini liggur á youtube ger einki, men tað er ov tilvildarligt og ringt at finna aftur. Vit ganga heldur ikki so øgiliga høgt upp í kvalitetin, sum útgangspunkt er alt betri enn einki.

FaroeSoccer hevur eisini spurt seg fyri í Kringvarpinum um loyvi at vísa brot úr 3-2 sendingunum serliga, men svarið higartil hevur verið noktandi. Har vísa tey fyrst og fremst til stóru ivamálini viðvíkjandi ognarrættinum og brúksrættinum, tvs. hvør eigur rættin til hvat. Men vónandi fer Kringvarpið at síggja fyrimunin í at samstarva við FaroeSoccer um hetta, tí tað er ein sannroynd, at Kringvarpið longu sum er brúkar nógv FaroeSoccer - og alt gott um tað! Og nakað tað sama kann sigast um tíðindaportalarnar báðar in.fo og portal.fo.

Vit vóna og vænta, at brúkarar okkara fara at taka væl móti hesi tænastu okkara, og vit vóna, at hetta kann vera til praktiska nyttu eisini. Vit frætta sera fegin frá øllum, sum eiga ella vita um videobrot, sum vit møguliga kunnu leggja út (ella sum hava betri kvalitet enn tey, sum vit hava lagt út longu). ALLAR kappingar, sum vit skráseta, hava áhuga.

FaroeSoccer takkar øllum hjartaliga, sum loyva okkum at leggja teirra góða arbeiði á netið til okkum øll at njóta og brúka.

Vit spæla saman!