Klæmint fekk sítt hattrikk

Beint sum FaroeSoccer hevði lagt greinina "Sjálvmál ella...?" út í gjár, kom hetta skrivið við telduposti frá Fótbóltssambandinum:

---

Rætting til dómaraseðil
Vísandi til dómaraseðilin í Effo-deildini millum Skála og NSÍ tann 23. mars 2014 skulu vit siga frá, at málið í 9. minutti, sum upprunaliga var skrásett sum sjálvmál, eftir áheitan frá dómaranum og eftir viðgerð í Kappingarnevndini er broytt soleiðis, at málskorari var Klæmint A. Olsen, NSÍ. 

---

Hetta hevur FaroeSoccer tikið til eftirtektar og broytt. Klæmint Olsen fekk altso ársins fyrsta hattrikk í Effodeildini og er í skrivandi løtu einsamallur toppskjútti við 4 málum.

FaroeSoccer hevur onga almenna meining, hvørt Klæmint átti hetta málið ella ikki, hetta er slettis ikki okkara borð. Hetta fekk NSÍ eisini at vita, tá umboð fyri felagið heitti á FaroeSoccer um at geva Klæminti hetta málið, ella at ávirka, so hann fekk tað. Tað, sum hevur nógv størri áhuga í hesum sambandinum er, at FSF nú at síggja til aktivt er farið inn í eina (ivasama) dómaraskráseting um eitt mál og hevur broytt hana. Hetta er fyrstu ferð, at slíkt er hent - FaroeSoccer kennir so einki fordømi.

Hvønn týdning fer tað at hava - um nakran - at FSF hevur tikið eina slíka avgerð? Fer Kappingarnevndin nú leypandi at taka støðu til, hvør eigur hvat mál, um áheitanir koma inn um hetta? Hvør kann heita á FSF um slíkt? Feløgini? Dómarar? Leikarar?

FaroeSoccer heldur annars, at grundleggjandi er tað fínt, um FSF hevði ein instans at gera av slík ivamál - eisini um øll ikki eru nøgd við avgerðirnar! Spurningurin er so, um júst Kappingarnevndin er rætti instansurin, ella um hetta skuldi verið ein meira samansettur bólkur av "serfrøðingum" á økinum, kanska ein 3-5-"manna"nevnd, harav møguliga ein dómari. Ein slík nevnd eigur bara at viðgera skotin mál, sum finnast á video.

Stjórin í Kappingarnevnd FSFs, Jákup Martin Joensen, sigur tó í stuttari viðmerking til FaroeSoccer, at FSF ikki hevur nakra itøkiliga ætlan um at seta nakra serliga nevnd at viðgera slík mál. Tað verður framvegis Kappingarnevndini, ið fer at taka sær av hesum. Jákup Martin undirstrikar, at hetta var bara eitt einstakt mál, har dómarin boðar Kappingarnevndini frá, at hann eftir nærri umhugsan heldur seg hava misstikið seg um eitt skotið mál, eftir at dómaraseðilin er útfyltur og latin frá sær.

FaroeSoccer er vitandi um, at NSÌ hevur roynt at fáa dómaran at broyta skrásetingina, og tað er púra nattúrligi og legali vegurin at fara. Kappingin um at skora flest mál í Effodeildini í fjør var líka til tað síðsta sera tøtt millum Klæmint Olsen (NSÍ) og Páll Klettskarð (KÍ), so tað er eyðsæð, at NSÍ ikki ynskir at taka nakran kjans á hesum økinum, einki forgjørt í tí. Um dómarin hevur kent nakað "trýst" á sær av NSÍ eftir Skáladystin í so máta er ringt at siga.

Formaðurin í Kappingarnevndini sigur annars víðari, at tað er ikki so nógv annað í hesum málinum. Feløgini kunnu til eina og hvørja tíð skrivliga seta seg beinleiðis í samband við Kappingarnevndina um avgerðir og/ella skrásetingar dómarans, sum tey meta skeivar, Í slíkum førum tosar Kapingarnevndin altíð við viðkomandi dómara, og stendur dómarin við sítt, og einki er at fara eftir í kappingarreglunum, so verður sjáldan nakað broytt - um nakrantíð. Hetta merkir, at enn sum áður eru avgerðir dómarans endaligar.