Sum útgangspunkt skrásetur FaroeSoccer bara tað, sum dómarin skrivar á dómaraseðilin, vit hava strangt tikið ikki loyvi til nakað annað, og tað er eisini tað einklasta at fyrihalda seg til.
Tað hendir tó meira enn so, at FaroeSoccer fær fráboðanir um, at vit hava skrásett okkurt skeivt, ella at okkurt manglar. Slíkar fráboðanir verða altíð tiknar í fullum álvara og avgreiddar beinanvegin – summatíðir má FaroeSoccer spyrja seg fyri hjá dómaranum (eisini av sínum eintingum), hetta typiskt um ivamál um kort, útskiftingar og mál. Men tað kann eisini vera, at fólk gera vart við eitt nú skeiv nøvn og føðingardagar. Alt hetta samskifti fegnast FaroeSoccer almikið um, tí sjálvsagt skal alt vera so rætt skrásett sum tilber.
Fótbóltur snýr seg um MÁL! Og tað er ikki líkamikið, hvør verður skrásettur fyri at skora tey ella at eiga tey. Hetta skilur FaroeSoccer so sára væl.
Stundum eru feløg og leikarar ósamd við dómaran, tá hann skrásetur eitt mál sum sjálvmál, kanska bæði tí at ein leikari vil eiga málið – og felagið vil eisini fegið t.d. hava ein toppskjútta (=prestisja). Men tað kann sjálvsagt eisini vera tí, at ongin leggur í at verða skrásettur fyri eitt sjálvmál. Eitt sjálvmál kann eyðsæð eisini verða skrásett sum sjálvmál uttan at seta navn á leikaran, men hetta heldur FaroeSoccer vera keðiligt og lítið áhugavert reint hagtalsliga. Nógv eldri sjálvmál á FaroeSoccer eru tó skrásett uttan navn, tí ongastaðni er upplýst, hvør gjørdi hesi sjálvmálini.
Okkum vitandi eru ongar ávísar leiðreglur fyri, nær eitt mál er sjálvmál – heldur ikki í altjóða høpi – og hetta er nokk heldur ikki nakað, sum fyllir nakað serligt í hugaheiminum hjá dómarum. Nakrir dómarar eru tilvitaðir um problematikkin og kekka væl hvat hendi, tá bólturin fór í netið, meðan aðrir leggja minni í tað og eru kanska í so skjótir at knalla eitt sjálvmál á dómaraseðilin.
Í onkrum londum finnast nevndir – ella panel av nøkrum “serkønum” – sum gera av, hvør eigur eitt mál, um nakað ivamál stingur seg upp. Vit kenna hetta m.a. frá Premier League, har avgerðir ofta verða tiknar langa tíð eftir dystin um, hvør alment skal skrásetast sum eigari av (iva)málum. Ongin slík nevnd finst í FSF (hóast at kalla øll mál í bestu deildini finnast á video í hesum døgum), og FaroeSoccer hevur onga heimild at gera nakað av heldur.
Eru feløg ósamd ella misnøgd við onkra skráseting hjá dómaranum, so er ikki nógv annað at gera enn at seta seg í samband við dómaran og royna at sannføra hann um, at hann hevur mistikið seg og síðani fáa hetta rættað á originala dómaraseðlinum og síðani helst eisini boða FaroeSoccer frá. FaroeSoccer rættar gleðiliga.
Vit spæla saman! :-)