Hóast FSF nú í nokkso rúma tíð hevur arbeitt við eini nýggjari KT-skipan, har m.a. elektronisk skráseting av dómaraseðlum er ein partur, so var tó ikki heilt klárt at seta hesa skipan í gongd, nú kappingin 2016 byrjaði. Tískil valdi FSF at binda um heilan fingur og gjørdi av at leingja avtaluna við FaroeSoccer. Hetta fegnast vit sjálvsagt um.
Eftir ætlan fer nýggja skrásetingarskipanin hjá FSF – sum er framleidd í Onglandi – at virka innan ikki alt ov leingi. FSF fer at kunna feløg og dómarar nærri um, hvussu mannagongdirnar skulu vera. Tá fara feløgini m.a. sjálvi at fáa ábyrgdina av at skráseta, tvs. stovna, flyta og “viðlíkahalda” leikarar í einum felags dátugrunni hjá FSF.
Í teimum deildum, har FSF setur dómarar, koma feløgini og dómararnir at fáa ábyrgdina av at skráseta dómaraseðlar. Partar av hesum dátum skulu so eftir ætlan eisini koma sjálvvirkandi á FaroeSoccer, so tey samlaðu føroysku hagtølini alla tíðina eru upp á pláss.
Tá nýggja skipanin hjá FSF fer at rigga, so verða fysisku (pappírs)dómaraseðlarnir tiknir av, og alt verður gjørt digitalt beinleiðis á netinum. Í fyrstu syftu fer FSF helst bara at royna nýggju skipanina í Effodeildini og 1. deild hjá monnum, men alt veldst um, hvussu skipanin og samanspælið millum allar aktørar fer at rigga.
FSF hevur sum er ongar ætlanir um at fara aftur í tíðina at skráseta nakað, tí hesin parturin er longu gjørdur av FaroeSoccer við góðum stuðli frá FSF, og tískil eru allar góðar orsøkir at samstarva – eisini framyvir. FaroeSoccer fer eisini at hava ábyrgdina av at skráseta allar føroyskar landsdystir framyvir.
Vit á FaroeSoccer eru spentir um nýggju skipanina hjá FSF og vóna, at hon fer at rigga væl, og at øll fara at taka væl ímóti henni. Hetta eigur at vera ein fongur fyri feløgini og fyri øll við áhuga fyri føroyskum fótbólti.