Um hesa tíðina í fjør høvdu vit seinastu kunningina um hvussu gongst við at útvega (profil)myndir. Tá høvdu vit umleið 1.700 leikaramyndir og eini 400 afturat av venjarum og dómarum. Nú hava vit so strítt okkum beint uppum 1.900 leikaramyndir (harav 1.450 menn) og gott 450 av venjarum og dómarum.
FaroeSoccer man hava myndir av eini 80-90% av øllum teimum núverandi íðkandi í teimum kappingum, vit skráseta. Hóast tær flestu myndirnar, ið mangla, eru av eldri/givnum leikarum og øðrum, so eru hesar ikki minni áhugaverdar fyri tað, tvørturímóti! FaroeSoccer roynir støðugt at finna (brúkiligar) nøkulunda samtíðar andlitsmyndir undir kanningararbeiði okkara av eldru tíðini.
Higartil í ár, hava vit fingið myndir av Effohópinum hjá B36 (takk til Pætur Jensen) og av 1. liðshópinum hjá 07 Vestur og MB (takk til Fróða Hera Poulsen). Eisini ein takk til ymsar einstaklingar, tit vita hvørji tit eru :-)
FaroeSoccer væntar at kunna taka fleiri andlitsmyndir í ár í mun til í fjør, men samstundis fara vit við hesum inniliga at heita á øll, feløg sum einstaklingar, um at taka myndir av leikarum, venjarum og dómarum og senda okkum avrit á fotboltshagtol@gmail.com. U18 hevur eisini stóran áhuga, tí har eru altíð nógvir nýggir leikarar hvørt ár. Bara sendið myndirnar sum tær eru – jú størri jú betri, vit vilja helst skera tær til sjálvir.
Ivast tit í onkrum í sambandi við slíka myndatøku, so eru tit vælkomin at lesa okkara vegleiðing ella góðu ráð um myndatøku undir YMISKT > MYNDIR > MYNDATØKA.
STÓRA takk fyri øll tit, sum hjálpa til at gera FaroeSoccer meira áhugavert – hetta ger sjálvsagt eisini tykkara felag meira áhugavert. Her eru bara vinnarar, eingir taparar :-)
Vit spæla saman!