Øll dómarahagtølini úti

Tað hevur leingi verið eitt ynski hjá FaroeSoccer at fáa fleiri dátur út á netið, og í dag komu vit so á mál við einum parti av hesum, tá persónligu hagtølini hjá hjálpardómarum, 4. dómarum og eygleiðarum gjørdust tøk á netinum.

Umframt at 4. dómari er komið afturat sum ein nýggjur valmøguleiki undir Dómarar í høvuðsvalmyndini, so er meira “kjøt” komið upp á Hjálpardómarar og Eygleiðarar. Nú er bara at opna onkra vangamynd (profil), velja ein av leiklutunum og klikka á samlaða dystartalið hjá hesum aktørinum, so fæst eitt skjótt yvirlit pr. ár yvir, hvørjar dystir hesin hevur verið partur av.

Tað er ongin loyna, at FaroeSoccer hevur havt eitt serstakliga gott samstarv við dómararnar yvirhøvur síðani byrjanina í 2009. Man kann nokk róliga siga, at uttan teir hevði borið illa til at veitt ta tænastu, sum vit gera. So í so máta er tað eyka gleðiligt, at innsatsurin hjá teimum ØLLUM, nú verður skrásettur fyri øll at síggja.  Dómararnir eru ein partur av spælinum júst sum spælarar, venjarar o.o.

Næsta klípið til varðan verður vónandi hagtølini hjá Hjálparvenjarum, og harafturat bíða eisini allir landsdystirnir hjá hinum føroysku landsliðunum. Vit kunnu tó tíverri ikki seta nakra dagfesting á hetta, men tað KEMUR!

FaroeSoccer fer við hesum at heita á allar dómarar og eygleiðarar um at kekka síni hagtøl og siga frá, um okkurt er komið skeivt fyri, ella um okkurt manglar. FaroeSoccer skrásetur vanliga bara tað, sum stendur á sjálvum dómaraseðlinum og ikki tað, sum stendur á Dómarayvirlitinum, sum FSF (Lassin) sendir út, tí oftani eru nógvar broytingar, sum ikki verða fráboðaðar.

Vit gleða okkum at hoyra frá tykkum, takk fyri góða samstarvið higartil.