Enn fleiri landsdystir á FaroeSoccer
fríggjadagur 9. oktober 2015
Tað gongur støðugt framá at fáa ymsu føroysku landsdystirnar á netið, nú eru U19-landsdystirnir hjá monnunum tøkir á FaroeSoccer. Næst í røðini er helst U17-liðið hjá monnunum.
Allir teir – higartil 63 – almennu U19-landsdystirnir hjá monnunum eru nú at síggja á FaroeSoccer. Teir eru at finna á høvuðsvalmyndini undir Landsdystir og U19.
Tað er ikki so øgiliga langt síðani, at vit løgdu U21-dystirnar út, so tað er at fegnast um, at tað longu nú lukkaðist at leggja U19-dystirnar afturat. Eins og við A-landsliðnum og U21 vísa vit eisini, hvørjir leikarar hava mannað U19-liðini síðani byrjanina, og hvussu nógvar dystir teir einstøku leikararnir hava umboðað Føroyar á U19-liðnum o.a.
Næsta málið er allarhelst U17-menninir, teir hava spælt nakað væl fleiri dystir enn U19, men vónandi gongur tó ikki alt ov long tíð allíkavæl, áðrenn hesir eisini eru partur av FaroeSoccer. Eftir hetta eiga kvinnurnar tørn.
FaroeSoccer frættir fegin, um nakað er at viðmerkja ella finnast at, takk fyri.
