KÍ vann og tí stendur á hjá TB

EFFODEILDIN - 25. UMFAR:

Tað gekk ikki hjá HB at vinna meistaraheitið seinasta umfar.

Møguleikin var til staðar, men tað var kanska í so næsadjarvt at rokna við, at besta boðið uppá ein nýggjan føroyameistara í ár, skuldi vinna torføra útidystin móti ÍF, tí fuglfirðingar hava havt gott tamarhald á HB í Fuglafirði seinnu árini.

Og dysturin var heldur ikki meira enn gott og væl byrjaður áðrenn ÍF hevði lagt seg á odda, og áðrenn havnarmenn høvdu vent sær var støðan 2-0. Og hóast langt var eftir, lá tað nú til, at ÍF skuldi minka um munin í stigatalvuni.

Tað var eisini tað sum hendi, tí gamaní kláraði HB at minka um munin, men teir kláraðu ikki at javna, sum var treytin fyri at meistaraheitið skuldi fáast til høldar, og tí hevði tað bara kosmetiskan týdning, at ÍF økti til 3-1.

Av hinum liðunum í oddanum vunnu NSÍ og B36 sínar dystir, og tí tykist nú rættiliga greitt, at EB/Streymur ikki sleppur út í Evropa at spæla næsta ár. Meistararnir, sum hava spælt evropeiskan fótbólt í nógv ár á rað, eru nú fýra stig frá triðja plássi, sum gevur atgongd til altjóða fótbólt, og tað er ósannlíkt at teir røkka tí.

Annars er tað í botninum, at stóri spenningurin er. Har er støðan hjá TB nú rættiliga kritisk.

Orsøkin er, at KÍ endiliga vann aftur. Eftir ikki at hava vunnið í 158 dagar. Tað hendi, tá KÍ í dystinum á útivølli móti AB vann við einum máli móti ongum.

Klaksvíkingar høvdu ikki vunnið ein landskappingardyst síðan 28. apríl í ár, og nýggi venjarin hevði ikki vunnið í 16 dystir, tá teir fóru út á Argir leygardagin. Teir høvdu knívin á barkanum, tí teir vistu, at vunnu teir ikki, so kundi vilja heilt illa til. Um ikki nú, so kanska um eina viku – ella tvær.

Men úrslitið gjørdist ein sigur, sum kortini mundi gloppið teimum av hendi, tá tað leið móti endanum, og tey trý stigini vóru nóg mikið til at fáa KÍ í so trygga fjarstøðu frá TB, at tað nú næstan er líkamikið hjá tvøramonnum.

TB hevur nú í veruleikanum fýra stig upp. Trý stig á talvuni og ein so stóran málmun, at tað telur sum eitt stig. Tað vil siga, at tvøramenn bæði skulu fáa stig móti HB á útivølli næsta umfar og móti Víkingi í seinasta heimadysti. Ein dystur, sum ivaleyst kann gerast tann seinasti Effodysturin við Stórá í hálvtannað ár.

Næstseinasta umfar verður spælt um eina góða viku, tá landsdystirnir eru avgreiddir, og tað sær soleiðis út: