Spenningurin í oddanum burtur

EFFODEILDIN - 24. UMFAR:

Tað hevur leingi ligið til tað, men nú kann tað sigast við næstan fullari vissu. HB verður føroyameistari í ár.

Tað mundu bara vera tey allar fæstu, sum ivaðust í, um tað fór at eydnast hjá HB, tí liðið var so langt frammanfyri hini liðini. Men tað er ikki fyrr enn munurin er so stórur, at liðið ikki kann fáast aftur, at tað er endaliga staðfest.

Heilt so stórur er munurin ikki, men nú táttar av álvara í. Sigurin hjá HB um vikuskiftið og ósigurin hjá ÍF hava við sær, at HB nú er átta stig frammanfyri ÍF, og tað eru bara níggju stig eftir at spæla um.

Ikki tí, ÍF kann minka munin niður í fimm stig sunnudagin, og tað er eitt krav, um bara eitt pinkalítið sindur av spenningi skal vera eftir í kappingini. Endar dysturin við javnleiki ella HB vinnur, so er kappingin um meistaraheitið avgjørd.

Men ÍF skal nú ikki bara ansa eftir HB. Fuglfirðingar fáa, um teir tapa, og NSÍ vinnur, brádliga kapping um silvurkrónurnar, og tað er helst meira enn teir ætlaðu. NSÍ er nevniliga stórfavorittur móti 07 Vestri sunnudagin, serliga, tí liðið seinasta sunnudag hølvaði B36 av á heimavølli. Gamaní hevði B36 bara tíggju menn, men kortini.

Hjá 07 Vestri er støðan júst sum hjá ÍF. Liðið skal vinna alt sum eftir er, og KÍ og TB skulu tapa alt sum eftir er. Soleiðis – og bara soleiðis – bjargar 07 Vestur sær. Men tað er ikki sannlíkt, og tí má takast fyri givið, at 07 Vestur flytir niður.

Spurningurin er so bara, um tað verður KÍ ella TB, sum flytur niður við 07 Vestri.

KÍ er spakuliga sokkin niður í dýpi, og sigurin hjá TB um vikuskiftið ger, at liðini nú eru ájøvn í stigum. Men KÍ hevur enn so nógv betri málmun, at hann telur sum eitt stig. KÍ hevði – enn einaferð – ein sigur í posanum, men teir gloymdu at binda fyri, og so kom EB/Streymur aftur íaftur. Og útjavnandi málið hjá EB/Streymi í yvirtíðini kann gerast dýrt. Tí tað gav TB møguleika at koma ájavnt við KÍ í stigum, og nú verður spennandi at síggja, hvat av liðunum hevur sterkastu nervarnar trý tey seinastu umførini.

KÍ fær sama møguleika sum TB hevði sunnudagin, við tað, at teir skulu spæla móti AB. Sjálvt um AB ikki statistiskt hevur bjargað sær, so er fullkomiliga ósannlíkt, at argjamenn kunnu enda í niðurflytingarsuppuni aftur. Og beint nú er spurningurin, um KÍ megnar tað sama, sum TB gjørdi sunnudagin, nevniliga at vinna á AB. Munurin er, at KÍ spælir á útivølli, og tað kann gera tað munandi torførari enn hjá TB. Vinnur KÍ ikki, sær svart út. Ikki tí, tað ger tað eisini hjá TB, sum spælir í Gundadali móti B36.

Dystirnir í 25. umfari vera spældir leygardagin og sunnudagin, og teir síggja soleiðis út: