Espa�ol English F�royskt

Toppurin sigraði móti botninum

mikudagur 2. mai 2018
6. UMFAR: Øll trý toppliðini høvdu heimavøll móti hinum trimum í niðaru hálvu á stigatalvuni, og ovarau liðini fingu sum væntað øll fult. Hóast ÍF/Víkingur gjørdi harða mótstøðu, so kom KÍ afturíaftur og vann sín dyst.

EBS/Skála er framvegis á odda í Betri Deildini og betraði eisini um frammanundan góða málmunin. 7-0 bleiv tað til móti B36, og tað var ikki eitt mál ov nógv. Aloftast er tað so, at tá eitt lið vinnur stórsigur, so hava kjansir verið til mangt slíkt, og soleiðis var eisini á Eiði. B36 møtti við bert einum eykaleikara (tað boðar ikki frá góðum!), og hesin eykaleikarin, blaðungi verjuleikarin, Bára Isaksen (15) varð tveitt fyri leyvurnar í seinna hálvleiki, tá hon noyddist í málið at standa fyri skadda landsliðsmálverjan, Jónu Nicolajsen.

Í Gundadali hevði HB gjørt nakrar broytingar á liðnum móti B68, eitt nú var Milja á beinkinum megnpartin av dystinum. Hesar broytingar vóru sum heild ikki til tað betra, og HB spældi ikki serliga sannførandi, hóast ein tryggan 3-0 sigur. Hinvegin var hetta nakað av tí frægasta, B68 hevur spælt í ár, og var bert eitt lítið sindur meira bit í álopinum, so kundu tær saktans havt fingið nøkur mál eisini. B68-venjarin koyrdi í heilum á tær at fáa tær longur fram á vøllin, so tær ikki allar endaðu harafturi í verjustøðu alla tíðina.

ÍF/Víkingur gav KÍ ein rættuligan hvøkk í Klaksvík, tí longu eftir 6 minuttir hevði kviki framherjin, Hanna Højgaard, lagt gestirnar á framum 2-0. KÍ fekk lítið at rigga í fyrra hálvleiki, so hálvleiksstøðan 0-2 var í lagi. Hanna Højgaard kom ikki út til seinna hálvleik vegna skaða, og hetta var kanska viðvirkandi til, at KÍ setti seg púrasta á seinna hálvleik, og ÍF/Víkingur vórðu hart revsaðar fyri persónlig mistøk. Tað er eisini ein kunstur at duga og tora at vera á odda. Tá samanumkom kundi KÍ væl havt vunnið meira enn 4-2. ÍF/Víkingur manglaði annars onkrar stuðulsleikarar hendan dystin, m.a. landsliðsleikaran Arnborg Lervig.

FSF boðar nú frá, at útsetti dysturin millum EBS/Skála og KÍ verður hósdagin 17. mai. FaroeSoccer hevur einki frætt, um FSF hevur gjørt nakrar viðmerkingar til kæruskrivið frá EBS/Skála um útsetta dystin.

Fyrru hálvfinalurnar i steypakappingini verða leiktar nú sunnudagin 6. mai:

EBS/Skála - ÍF/Víkingur kl. 13:30 í Streymnesi
KÍ - HB kl. 12:30 í Klaksvík

7. umfar í Betri Deildini verður 13. mai, og tá verður tað aftur ovara hálva móti niðaru hálvu, men hesa ferð eiga øll liðini í niðaru hálvu hemavøll:

B36 - HB í Gundadali
ÍF/Víkingur - EBS/Skála í Gøtu
B68 - KÍ á Toftum

Úrslit og støða og onnur hagtøl í Betri Deildini síggjast annars HER.

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019