Suðringar granska fortíðina

Tað er einki yvir at dylja, at suðringar líka síðani byrjanina hava verið sera jaligir mótvegis FaroeSoccer, allarhelst tí at tey hava kent seg fingið eina góða og álítandi tænastu afturfyri teirra góða samstarvsvilja. Hetta hevur í mongum førum lætt munandi um skrásetingararbeiði okkara, tað eru vit vitandi um og takksamir fyri.

Søguliga sæð eru liðini í Suðuroy nokk tey, sum eru ringast ella minst skrásett av føroysku feløgunum, hetta av fleiri ymsum orsøkum:

1) Suðuroyggin hevur (at kalla) ikki havt nakran lokalan fjølmiðil (blað)
2) Feløgini hava ligið ov langt burtur í mun til fjølmiðlarnar, sum at kalla allir hava hildið til í Havn
3) Tá TB og VB fyri ein stóran part av tíðini ikki hava verið við til at mynda toppin í bestu deildini, so hevur áhugin eisini verið minni at skriva um teirra dystir (og enn minni tá liðini hava spælt móti hvør øðrum) 
4) Umsitingin hevur verið ov la-la í feløgunum, og gerðabøkurnar siga ikki nóg nógv um dystirnar. 
5) Av onkrari orsøk mangla eisini serliga nógvir dómaraseðlar frá dystum hjá TB og VB.


Gott fólk í TB-húsinum f.v.: Marni Mortensen (FaroeSoccer), Helgi Eidesgaard (fyriskipari), Hans Pauli Holm, Petur Hammer, Einar Larsen, Ásmund Nolsøe, Thorbjørn Hermansen, John Rødgaard. Harafturat var ein dama har, sum absolutt ikki vildi við á myndina! Tað var serstakliga hugaligt, at gamla TB-kempan, Einar Larsen, legði leiðina framvið. Mynd: FaroeSoccer.


Hesum greiddi Marni Mortensen fyri FaroeSoccer m.a. frá á tveimum væleydnaðum fundum í VB-húsinum og í TB-húsinum í gjár. Eini 10 fólk vóru møtt fyri bæði feløgini, og tað var nøkulunda sum mett og nøktandi. Hetta var fyrst og fremst eitt kunnandi tiltak (fyri eldri felagsfólk og leikarar), har greitt var frá um verkætlanina og heimasíðuna FaroeSoccer, og hvat man kann finna har og hvussu. Men tað, sum hevur serligan áhuga fyri FS, er í grundini tað, sum IKKI finst á heimasíðuni, tí dómaraseðlar mangla og fjølmiðlarnir og aðrar keldur einki upplýsa heldur. Her appelerar FaroeSoccer so til minni hjá fólki, at spreiða boðaskapin um FaroeSoccer og at fáa tey at siga frá í komandi tíðum, um tey detta á nakað, sum ikki er skrásett.

Eitt heilt ítøkiligt mál er t.d. manglandi føðingardagar hjá eldri leikarum, ella hvar á vøllinum teir leiktu, hetta er nakað feløgini kunnu hjálpa til við. tað er bara at gjøgnumganga hóparnar tey ávísu árini í ymsu kappingunum.

Við á báðum fundunum var eisini ein av nýggju starvsfólkunum hjá FSF, Mourits Joensen, sum var í oynni í øðrum ørindum. Mourits hevur fingið ábyrgdina av nýggju KT- og skrásetingarskipanini, sum FSF hevur í umbúna at seta í verk komandi kappingarár, og tí var tað hugaligt, at hann var við, heilsaði upp á (áhugaverd) felagsfólk og kunnaði seg um og vísti áhuga fyri skrásetingararbeiðnum hjá FaroeSoccer. Hesa stóru KT-uppgávu hansara, og hvussu eitt møguligt framhaldandi samstarv við FaroeSoccer kann vera, fara vit uttan iva at hoyra meira um í komandi tíðum.

Í Vagi var tað Jón Pauli Olsen, sum stóð fyri, og á Tvøroyri var tað Helgi Eidesgaard, sum skipaði fyri. Tað gjørdu teir sera væl og FaroeSoccer takkar hjartaliga fyri hjálpina og fyri áhugan. Eisini ein stór takk til tykkum onnur, sum ómakaðu tykkum til tiltakið. Her skal nokk okkurt gott fara at spyrjast burturúr.

Enn er eingin avtala gjørd við nakað annað felag um ein líknandi kunningarfund, men væntandi stendur KÍ ella B36 næst fyri. Meira um hetta seinni. 


Mourits Joensen (FSF) og Jón Pauli Olsen (VB/FC Suðuroy) í VB-húsinum beint eftir fundin, tíverri vóru fólk horvin, tá ein felagsmynd skuldi takast. Men tey á fundinum vóru umframt hesar báðar og Marni Mortensen: Eyðun Johansen, Jens Petur Brattalíð, Eyðun Kjærbo, Thorleif Augustinussen, Henry Hansen, Óli Holm, Páll Augustinussen, Hans Jacob Hjelm og Napoleon (Poli) Sørensen. Mynd: FaroeSoccer.