FaroeSoccer og FSF halda fram
mikudagur 26. februar 2014
Tað hevur verið eitt sindur ivasamt, men Í dag hava FaroeSoccer og Fótbóltssambandið gjørt avtalu um at halda fram at samstarva. Hetta skuldi verið góð tíðindi hjá øllum við áhuga fyri føroyskum fótbólti.
Tað hevur drigið eitt sindur út í ár við at koma á mál við at gera eina avtalu við Fótbóltssambandið um skrásetingina av dómaraseðlunum, hetta einamest tí FSF hevur verið í holt við at menna teirra egnu skrásetingarskipan, sum m.a. skuldi umfata ein elektroniskan dómaraseðil. Á aðalfundi FSFs herfyri nevndi formaðurin í formansfrágreiðing síni, at ætlanin var, at henda nýggja skipanin skuldi takast í nýtslu hetta kappingarárið - fyri fyrst eina varliga byrjan við Effodeildini og 1. deild monnum.
Í skrivandi løtu er framvegis óvist, hvussu langht hendan KT-ætlanin hjá FSF er komin, men FSF hevur so undir øllum umstøðum valt at binda um heilan fingur og gera eina avtalu við FaroeSoccer um dómaraseðlarnar aftur í ár. Avtalan varð undirskrivað í dag, og hetta verður so fimta árið, at FaroeSoccer skal hjálpa FSF við hesi spennandi uppgávuni. Tað gera vit sjálvsagt fegnir og gleða okkum longu til nýggja kappingarárið.
Hetta merkir, at FaroeSoccer framvegis hevur ábyrgdina av at skráseta dómaraseðlarnar í kappingum niðanfyri og at fáa teir á netið skjótast tilber eftir loknan dyst:
Effodeildin
1. deild menn
2. deild menn
U18 dreingir
Stórsteypadystur
Løgmanssteypið
Evropa Cup menn
U18 dreingir steypakapping
1. deild kvinnur
Kvinnur steypakapping
Evropa Cup kvinnur
Dystirnir í heimligu kappingini eru stórt sæð allir teir dystir, sum FSF setur dómarar á. Restina hættar FaroeSoccer sær sum er ikki undir enn, tí tað er alt ov tilvildarligt og illa upplýst, hvør dømir, og hvussu dómaraseðlarnir verða útfyltir (um yvirhøvur).
Harafturat heldur FaroeSoccer sjálvsagt av sínum eintingum fram við at skráseta allar landsdystir føroyinga, eins og vit eisini skráseta teir altjóða dystir, sum hava føroyskar dómarar og eygleiðarar.
Tær nýggju kappingarnar í 2014, sum FSF hevur lagt og boðað frá alment, eru lagdar út á FaroeSoccer, og tær verða eisini at síggja á fsf.fo sum skjótast.
Vit vóna og vænta sama samstarvið og sama góða viljan frá FSF-fyrisitingini, feløgunum og dómarunum at fáa alt at ganga so smidligt og skjótt sum tilber til gleði fyri øll við áhuga fyri føroyskum fótbólti. Okkara partur fer sum vant ikki at liggja eftir!
FaroeSoccer ynskir øllum eitt gott og spennandi kappingarár.
Vit spæla saman!
