Kend (og minni kend) andlit á fundi í HB-húsinum í morgun: f.v. Marni Mortensen, Allan Dybzcak, Jákup Reinert, Heri Nolsøe, Børge Hansen, Egga Jensen, Eyðfinn Lamhauge, Tummas Óli Mortensen, Finnbogi Arge, Martin á Mýrini og Johan Nielsen. Mynd: FaroeSoccer.
Tað skerst ikki burtur, at tað er serliga frá eldru tíðini, at dómaraseðlar og upplýsingar mangla, og tá tað eldra ættarliðið harafturat – ikki løgið men tíverri – oftast er lítið á netinum, so kann vera trupult at fáa boðskapin ordiliga út um FaroeSoccer.
FaroeSoccer hevur í longri tíð havt eina ætlan um at fara út kring landið at vitja feløgini - serliga eldri leikarar – at kunna meira um heimasíðuna. Hesa ætlan var hol sett á í dag, tá vitjað varð í HB-húsinum. Eini 10 mans troppaðu upp fyrrapartin, og tað gjørdust einir tveir góðir og gevandi tímar saman. Kaffi og vinarbreyð gjørdi tað sjálvsagt ikki verri :-)
Høvuðsendamálini við tiltakinum eru tvey: at kunna um FaroSoccer generelt og at heita á tey uppmøttu um at breiða boðskapin og royna at hjálpa til at finna upplýsingar, sum mangla – teir eru ikki so fáir, tíverri.
FaroeSoccer hevur nú troytt at kalla allar kendar keldur og skrásett tað, sum er at finna, so nú er ikki nógv annað at fara eftir enn minnið hjá aktørunum sjálvum. Hetta er søgan hjá feløgunum, talan er um, og tað av eldru tíðini, sum ikki verður skrásett komandi 1-2 árini, verður tað neyvan nakrantíð!
Eftir væl lukkaða tiltakið í HB-húsinum eru er ætlanin at fara somu kunningarferð til suðriar at vitja VB og TB, vónandi komandi vkuskifti.