AB heiðrar Jónas Stenberg

Fyrst ljóðaði, at heiðranin av Jónasi Stenberg skuldi vera í sambandi við dyst hansara nummar 200 fyri besta liðið hjá felagnum. Men á heiðursbrævinum, sum formaðurin í AB handaði Jónasi saman við einum blómutyssi eftir dystin, verður bara takkað fyri dyst hansara nr. 200 fyri felagið – og fyri trúfesti hansara. Á heimasíðuni hjá AB verður síðani m.a.  sagt:

“Dysturin í dag 27. juli millum  AB og EB/Streym var dystur nummar 200, sum Jónas Stenberg hevur spælt fyri AB. Í hesum dystum eru taldir allir dystir, sum spældir eru í U18 og Effodeildini, 1. deild og 2. deild.”

Heimasíðan hjá AB vísir til profilin hjá Jónasi á FaroeSoccer sum keldu. AB hevurn eisini lagt eitt sjónband á YouTube: https://www.youtube.com/watch?v=__FetYh356k&feature=youtu.be

Alt gott um hetta, og rós vert at feløg vilja og hava yvirskot at heiðra sínum (mest) trúgvu spælarum alment – og FaroeSoccer gratulerar eisini Jónas.

Tá hetta er sagt, so hevur FaroeSoccer líka nakrar fáar viðmerkingar:

FaroeSoccer hevur skrásett Jónas Stenberg fyri júst 200 dystir í gjár. Hesir kunnu býtast upp soleiðis:

173 landskappingardystir á besta liðnum, 61 í Effodeildini og 112 í 1. deild.
12 dystir um Løgmanssteypið – hetta eru eisini dystir á besta liðnum.
11 dystir í 1. deild í 2010, tá besta liðið leikti í Effodeildini (Vodafonedeildini).
4 dystir í  2. deild í 2009, tá besta liðið leikti í Effodeildini (Vodafonedeildini).

Eftir hesum kann sigast, at Jónas hevur leikað 185 dystir á besta liðnum hjá AB. Hann hevur ikki umboðað onnur feløg hesa tíðina.

FaroeSoccer hevur ikki skrásett Jónas fyri nakran U18-dyst (sum AB vísir til á heimsíðuni), tí U18-dystir verða ikki skrásettir á FaroeSoccer fyrrenn í 2012. So her man hann nokk eiga minst eini 20-30 dystir afturat (um hann var við alla tíðina tá, og um AB hevði lið við í kappingini). Jónas kann eisini hava leikt onkrar dystir í t.d. 3. deild, sum FaroeSoccer ikki skrásetur (enn...). 

Tað stutta av tí langa er, at AB hevur heiðrað Jónas – í allarbestu meining - fyri hansara 200 skrásettu dystir á FaroeSoccer, men at hetta talið ikki ordiliga sigur alla søguna. Jónas er bara 27 enn, so hann man tíbetur eiga nógvar dystir enn á Argjum.

Vónandi fara onnur feløg eisini at fylgja við teimum ymsu hagtølunum fyri t.d. at heiðra sínum góðu og trúgvu leikarum. Tað er hugaligt, at FaroeSoccer kann brúkast til hetta positiva endamálið. Er nakað ivamál, hvussu tøl á FaroeSoccer skulu skiljast, so er bara at seta tykkum í samband við okkum. Best er at hava síni fakta upp á plass.

Vit spæla saman!


Mynd: AB 2014.