FaroeSoccer og Bilrøkt spæla saman

Tveir vælnøgdir menn gleða seg til nýggja kappingarárið: Marni Mortensen (vm) fyri FaroeSoccer og Jákup á Borg fyri Bilrøkt (Mynd: FaroeSoccer).


Í dag hava P/f Bilrøkt og FaroeSoccer skrivað undir eina stuðulsavtalu fyri 2015 um ein leigubil. Tað er ongin annar enn livandi fótbóltslegendan, Jákup á Borg, stjóri hjá Bilrøkt, sum skrivar undir vegna vælkoyrandi bilfyritøkuna, meðan Marni Mortensen skrivar undir vegna FaroeSoccer.

Tá FaroeSoccer seint í fjør spurdi seg fyri hjá Bilrøkt um møguleikan fyri eini stuðulsavtalu um ein leigubil við serligum atliti til meira víttfevnandi kanningararbeiði kring oyggjarnar í 2015, so vendi ein sera positivur Jákup á Borg beinanvegin aftur fyri Bilrøkt, og úrslitið av hesum samskiftinum síggja vit so í dag – og vónandi árið 2015 á tamb!

Tað er ikki at taka munnin ov fullan at at siga, at Marni er ein ómetaliga vælnøgdur maður í dag, tí fíggjarstøðan hjá honum og verkætlanin við FaroeSoccer rúma ikki einum bili, og tað avmarkar ofta arbeiðið við hjartabarninum og ger tað eisin truplari:

 – Hetta er einki minni enn eitt kupp, ein fantastisk avtala fyri FaroeSoccer! staðfestir Marni. – Nú verður nógv lættari at tilrættisleggja arbeiðið, og ikki minst tunga og tíðarkrevjandi kanningarpartin (research), sum einans kann gerast í frítíðini og í ferium. Tað er bara ein ávísur partur av kanningararbeiðinum, sum kann orðnast við telefon og interneti. Stundum er avgerandi neyðugt at “troppa upp” sjálvur, sigur Marni, og hendan partin er nakað hann gleðir seg til skilst.

– Tað snýr seg millum annað um at koma runt um í landinum at finna og taka myndir og video og práta við eldri leikarar og felagsfólk. Eg vænti, at við hesi stuðulsavtaluni kann heilt nógv fáast av skafti í ár, og eg eri alvorliga fegin og errin um, at Bilrøkt og Jákup duga at síggja virðið í okkara arbeiði, sum fyrst og fremst snýr seg um at skráseta føroyskan fótbólt – men samstundis eisini er ein partur av føroyskari siðsøgu. Hetta er eitt stórt herðaklapp og gevur eisini motivatión og hug at halda fram við skrásetingini, sigur Marni.

- Í sambandi við at Fótbóltssambandið allarhelst fer at brúka eina nýggja skrásetingarskipan til dómaraseðlarnar í ár, fer hetta møguliga at skapa avlopstíð í dagføringunum hjá FaroeSoccer og tessvegna vónandi meira tíð til kanningararbeiði, og so verður enn meira nytta burtur úr einum tøkum bili, sigur Marni at enda.

Jákup á Borg, fegnast eisini um avtaluna, bæði sum stjóri á Bilrøkt og sum íðkandi fótbóltsleikari og fótbóltsáhugaður:

– FaroeSoccer ger eitt framúrskarandi arbeiði fyri føroyskan fótbólt og øll, sum hava áhuga fyri føroyskum fótbólti. Eg veit frá Bilrøkt, at einki kemur av sær sjálvum! Nógv og hart arbeiði liggur aftanfyri FaroeSoccer. Heilt nógv fólk kekka hagtølini á FaroeSoccer hvønn einasta dag, tí tey finnast onga aðrastaðni! – Tað er ein sera góð kensla at kunna stuðla hesum slóðbrótandi arbeiðinum hjá FaroeSoccer og samstundis stuðla føroyskum fótbólti sum heild. Fyri okkum er hugaligt og avgerandi, at Bilrøkt kann setast í sambandi við nakað positivt og serstakt. Bilrøkt ynskir FaroeSoccer framhaldandi góðan arbeiðshug, og vit vænta eitt gott og gevandi samstarv, sigur stjórin og føroyameistarin, Jákup á Borg at enda.

Sjálvur gleðir Jákup seg sum vera man at síggja FaroeSoccer skráseta tey næstu trý málini í bestu deildini hjá sær sjálvum, so hann loksins kann taka metið frá John Petersen (147 mál) sum mest skorandi leikarin nakrantíð í bestu deildini! Livst so spyrst :-)