FSF og FaroeSoccer samstarva

mikudagur 7. apríl 2010

Tað er eingin loyna, at tíðin er farin frá heimasíðuni hjá Fótbóltssambandinum nøkur ár síðani longu, og ikki minst hevur úrslitatænastan verið darvað av hesum.

Serliga seigliga handfaringin av dómaraseðlunum hevur elvt til ávísar umsitingarligar trupulleikar í FSF. Hetta hava FSF og FaroeSoccer sett sær fyri at gera nakað við - beinanvegin.

FaroeSoccer og FSF hava gjørt eina avtalu galdandi fyri 2010, sum inniber, at FaroeSoccer átekur sær at dagføra týdningarmiklastu kappingarnar hjá FSF. Her verður fyrst og fremst hugsað um Vodafone, 1. og 2. deild menn og 1. deild kvinnur umframt steypakappingarnar báðar hjá monnum og kvinnum.

So var avtalan loksins undir-   skrivað, og tveir vælnøgdir menn taka lógvatak: Virgar Hvidbro, aðalskrivari hjá FSF (v.m.) og Marni Mortensen fyri FaroeSoccer.











Hetta verður gjørt við at innlesa dómaraseðlarnar frá dystunum skjótast tilber eftir loknan dyst, og helst ikki seinni enn 1-2 tímar eftir leiklok. Í somu løtu, dómaraseðlarnir eru innlisnir, eru støður, kort og mál og annað dagført og klárt hjá øllum at lesa her á síðuni og partvíst eisini á heimasíðuni hjá FSF.

Hetta merkir grundleggjandi, at dómaraseðilin, sum sæst á FaroeSoccer ER tann upprunaliga galdandi hjá FSF. Øll hagtøl - støður, úrslit, mál og kort v.m. - sum síggjast á FaroeSoccer fyri 2010 eru tey almennu hjá FSF.

Leikaranøvnini á FaroeSoccer hava einki við spæliloyvi teirra at gera. Tað er framvegis listin á fsf.fo, sum er galdandi ella tað tilfar, sum FSF til eina og hvørja tíð liggur inni við.

Um hetta samstarvið skal lukkast til fulnar, so krevur tað, at serliga dómararnir og feløgini spæla við - og spæla VÆL við! Tvs. at feløgini ella liðini saman við dómarunum onkursvegna syrgja fyri fáa FaroeSoccer dómaraseðilin beint eftir dystarlok. FaroeSoccer hevur onga heimild at áleggja nøkrum nakað men vónar bara vælvild og samstarv, tí okkara partur skal heilt sikkurt ikki liggja eftir! Tey feløg og teir dómarar, sum onkursvegna ikki liva upp til samstarvið, sum lagt er upp til, skulu tó ikki vænta sær frið og náðir frá FaroeSoccer! So vita tit tað! :-)

FaroeSoccer vónar, at dómarar og feløg fara at síggja fyrimunin við at arbeiða saman við FaroeSoccer um hetta, tí annars kann tað blíva ómetaliga tungt og trupult hjá FaroeSoccer at liva upp til tað, sum vit og FSF (vegna feløgini) fegin vil við hesum samstarvinum. Um rætt verður borið at, eiga øll at fáa stórar fyrimunir og nógvar góðar løtur av hesum samstarvinum.

Einaferð seinni í ár fara FSF og FaroeSoccer at taka samanum samstarvið inntil tá og tosa um, hvørt hetta samstarvið skal halda fram - og allarhelst úbyggjast, ella partarnir heldur vilja okkurt annað. Men uttan mun til hvat FSF tá ger av, so kunnu brúkarar okkara vera vísir í, at FaroeSoccer er komið fyri at verða, vit geva ikki upp áðrenn leiklok!