Hvussu er FaroeSoccer øðrvísi?

Tað, sum FaroeSoccer hevur framum aðrar fótbóltssíður á netinum, er fyrst og fremst ein brennandi áhugi fyri føroyskum fótbólti. Á FaroeSoccer er føroyskur fótbóltur ikki bara ein viðfáningur ella ein parantes men sjálvt innihaldið ella meiningun við tí heila, og vit brúka alla okkara tíð og orku til hetta.

Føroyar verða (allarhelst) ongantíð heimsmeistarar, og HB fer neyvan at vinna Champions League nakrantíð, men føroyskur fótbóltur er okkara! Eitt stórt privilegium sum vit eiga at fara væl um og hjúkla fyri. Og tað gera vit her á FaroeSoccer.

At vit "handan leiktjøldini" á FaroeSoccer eru føroyingar búsitandi í føroyum er ein styrki og eitt gott útgangspunkt fyri álítandi hagtølum, tí atgongdin til tey er styttri og betri. Sum okkurt klókt høvd segði: vit vilja ikki gita, vit vilja vita!

Tað eru ivaleyst av síðum til, sum gera burturúr fótbólti í øðrum londum. Ikki tí, tær síðurnar vilja vit sjálvsagt ikki vera fyriuttan, men FaroeSoccer er bara til føroyskan fótbólt, føroysk feløg og føroysk landslið, menn og kvinnur. Vit vilja hava hagtøl uppá feløg, landslið, leikarar, venjarar, dómarar osfr. Alt slíkt, sum ikki hevur verið til nakrastaðni fyrrenn í dag - alt samlað á einum staði, bara ein handavend at finna - og ókeypis!

Nú slepst undan at petta saman hagtøl úr gomlum gerðabókum, fjølmiðlum, jubileumsbókum og ivasama minninum hjá góðum fólki, tí FaroeSoccer hevur longu gjørt hetta arbeiðið fyri tykkum frá frægastu kelduni, nevniliga dómarseðlunum sjálvum.

Enn eru vit ikki komnir á mál við skrásetingini og við forritingini - langt frá, men hóast tað er FaroeSoccer longu nú ein sera brúkilig síða fyri tíðarskeiðið 1991 til í dag, og tað er ikki so lítið - eini 13.000 dystir og omanfyri 5.000 leikarar.

Endamálið við FaroeSoccer er at gera síðuna so livandi og viðkomandi sum møguligt, hetta við at til ber at klikkja á nærum alt fyri at fáa meira at vita. Í prinsippinum eru øll nøvn og øll tøl við blaúm liti aktiv link, tvs. við at klikkja á hesi fæst meira at vita. Við at klikkja á úrslit slepst t.d. beineliðis inn á elektroniska dómaraseðilin.

Á nøkrum økjum halda vit okkum vera frammanfyri líknandi útlendskar síður, bæði tá tað kemur til forriting, og tá tað kemur til at skráseta fakta. Tí tað eru ikki nógv fótbóltssambond í heiminum, sum loyva privatfólki at avrita og brúka teirra upprunaligu dómaraseðlar, men her hevur FSF tíbetur kent sína vitjunartíð.

FaroeSoccer sparkar ikki reyv, men tað er alvorliga nær við! :-)

Lesið annars meira um FaroeSoccer og endamál og ætlanir okkara undir YMISKT á høvuðsvalgeiranum í erva.