Dómaraseðlarnir samanum higartil
sunnudagur 11. apríl 2010
Nú nøkur vikuskifti eru farið afturum, og takast skal samanum, so hevur gingið nøkulunda sum væntað. Størsti trupulleikin hjá FaroeSoccer eru dómaraseðlarnir í 2. deild hjá monnum.
Herfyri heitti FSF í skrivi á feløgini og dómararnar um at spæla saman við FaroeSoccer í sambandi við dómaraseðlarnar í hesum kappingunum:
Vodafonedeildin
1. deild menn
2. deild menn
Løgmanssteypið
1. deild kvinnur
Steypakappingin kvinnur
Skrivið kann annars síggjast her.
Hetta skrivið hevur rinið við fleiri staðir - bæði í feløgunum og hjá dómarunum - men onnur hava verið meira trek at hava við at gera. Hetta kemur ikki óvart á, bæði tí summi feløg eru betri organiseraði enn onnur, og tí tað eru uttan iva tey - bæði dómarar og felagsfólk - sum bara síggja hetta sum eyka (ólønt og ótakksamt) arbeiði, meðan hini heldur síggja mongu møguleikarnar í FaroeSoccer fyri sær.
Tænasta til feløgini
Vit á FaroeSoccer - og FSF fyri tans skuld eisini - vóna, at øll fara at síggja fyrimunirnar av hesum samstarvinum innan langt er fráliðið - ja, kanska longu nú! Hetta er jú nakað sum flest øll hava suffað um nú í fleiri ár, hetta at man ikki kann síggja eitt yvirlit yvir gul og reyð kort, mál, støður, leikara- og dómarahagtøl - og ikki bara at síggja hetta, men at síggja tað skjótt!
1. deild kvinnur og 2. deild menn - og partvíst 1. deild menn
Hesa tænastuna bjóðar FaroeSoccer nú øllum. Men hetta krevur, at dómararnir og serstakliga feløgini spæla saman við okkum. Her er serliga umráðandi at hugsa um lægru deildirnar so sum 1. deild kvinnur og 2. deild menn. Her mugu feløgini (venjarar og onnur álítisfólk) vera meira obs upp á, um atgongd er til tey røttu rúmini (fax, internet) beint eftir dystin. Um ikki, so skal allarhelst ein eyka (jaligur) innsatsur til.
GEVIÐ GÆTUR
Tá dómaraseðlarnir til Vodafone og 1. deild menn verða brúktir, skal FaroeSoccer hava øll trý eintøkini, tvs. Dómaraseðilin OG Leikaralistarnar.
Tá dómaraseðilin til hinar deildirnar verður brúktur, skal ovasta frumavritið brúkast at faksa ella skanna, tí hini avritini er oftast ov vánalig og síggjast ikki, tá tey koma fram.
Øll byrjan er torfør
Broytingar og nýggj ting krevja aloftast eina innkoyringartíð, og soleiðis væntaðu vit eisini, tað fór at verða við dómarseðlunum og FaroeSoccer. Higartil hevur tað als ikki verið katastrofalt, og vit hava yvirhøvur merkt ein sera jaligan vilja at fáa hetta at rigga, og hetta takka vit fyri.
Tá feløg og dómarar hava vant seg við hetta - og síggja fyrimunirnar av hesum - so vænta vit, at tað tað mesta bara verður eitt spæl. Fær FaroeSoccer neyðugu tænastuna, so fáa øll onnur hana eisini - okkara partur fer heilt sikkurt ikki at liggja eftir!
Við vón um framhaldandi og enn betri samstarv til gleði fyri øll við áhuga fyri føroyskum fótbólti.
FaroeSoccer
Vit spæla saman
