Español English Føroyskt

Suni Merkistein skrivar bók fyri FSF

mikudagur 14. apríl 2010
FSF gjørdi í fjør eina avtalu við útvarpsmannin og rithøvundan, Suna Merkistein, um at gera eitt bókaverk um føroysku fótbóltssøguna. Eitt gott hugskot og eitt gott val.

Í 2009 vóru liðin 30 ár, síðani FSF varð sett á stovn, og í hesum sambandi gjørdi FSF eina avtalu við útvarpsmannin og rithøvundan, Suna Merkistein, um at gera eitt bókaverk um føroysku fótbóltssøguna. 

Hetta ljóðar eisini at síggja til sum góð tíðindi fyri allar føroyskar fótbóltsfjepparar, men tað hevur víst seg at vera ein tungur burður at koma á mál viðvíkjandi hesi ætlanini, og trupult hevur eisini verið at arbeiða seg fram móti einum útgávudegi, allarhelst vegna nógva “rumblið” í FSF í 2009 og núverandi ússaligu fíggjarstøðuna. Heitt varð eisini á Marna Mortensen um at hjálpa til í sambandi við hagtølini, og hesum játtaði Marni vegna FaroeSoccer.

Av einhvørjari orsøk hevur FSF hildið so ómetaliga lágan profil um hetta stóra og ambitiøsa verkið, at nærum eingin veit nakað um tað. Eitt nú er hetta ongantíð nevnt við einum orði á FSF-heimasíðuni, og heldur ikki á aðalfundinum herfyri varð hetta tikið upp á tungu. Hetta kann tykjast rættuliga løgið sæð í ljósinum av, at hetta er ein so spennandi verkætlan, umfram at tað kundi verið ein hjálp hjá Suna (og harvið FSF), at ætlanin var almenn, so lættari var at koma í samband við møguligar keldur, eitt nú viðvíkjandi myndum o.l., alt fyri at fáa verkið so gott sum tilber í síðsta enda.

Suni Merkistein hevur tó m.a. í góðum samstarvi við FaroeSoccer arbeitt støðugt við bókini – ella bókunum (tað er ikki avgjørt enn), og ætlanin varð, at okkurt skuldi koma út í ár. Men ivasama fíggjarstøðan hjá FSF tykist skapa forðingar fyri møguligari útgávu í ár. Í skrivandi løtu veit Suni ikki, hvussu verður við hesum. Men sum skilst er hann væl nøgdur við tað, sum er komið av skafti hjá honum sjálvum higartil, og lítið man vera at ivast í, at vit onnur hava nógv at gleða okkum til.

Fótbóltssøgan snýr seg í mestan mun um bestu deildina og landsliðið. Umframt at Suni hevur FaroeSoccer at hjálpa sær við hagtalspartinum, so hevur hann eisini Eydnu Vidtfeldt afturat sær at hjálpa við myndapartinum, og Kristin Dam Ziska hevur sett kappingartalvurnar upp. Tað er serliga tann eldri – aloftast ókendi – parturin av hagtølunum, sum elvir til iva og høvuðbrýggj, so her skal samstarvið við FaroeSoccer veruliga standa sína roynd. 

FaroeSoccer vónar, at FSF skjótt fer at taka sær um reiggj at fáa hesa spennandi ætlanina framda í verki. FaroeSoccer er framhaldandi tilreiðar at veita Suna eina hjálpandi hond, og vit ynskja honum og FSF bestu eydnu við bókaverkinum. 

  

Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019