Español English Føroyskt

ENDILIGA kick-off!

fríggjadagur 9. apríl 2010
Leingi er tað, ið væl skal vera - men loksins er føroya størsti og einasti fótbóltsdáturgrunnur on-line. Vit heilsa øllum okkara brúkarum hjartaliga vælkomnum.

Hjartaliga vælkomin til FaroeSoccer!

Vit náddu tíverri ikki á netið áðrenn kappingarbyrjan, men nú eru vit so her, og vit fara ongan veg aftur!

Tað, sum byrjaði ambitiøst og málrættað - men tó í smáum í 2005 - gjørdist munandi drúgvari enn vónað og ætlað. Av fyrstani tíð var meiningin at vera on-line nokkso skjótt við einum avmarkaðum parti, men hendan ætlanin helt tíverri ikki, men hinvegin er útgávan, sum vit nú endiliga eru on-line við, bara so mikið betri og fevnir um nógv meira.

Hetta er ein alvorliga stórur, spennandi og gleðiligur dagur fyri okkum, og vit vóna og vænta satt at siga eisini, at heilt nógv onnur frøast við okkum vegna føroyskan fótbólt. 

FaroeSoccer er fyrst og fremst ein heimasíða um føroysk fótbóltshagtøl, hóast tíðindi eisini eru ein partur av síðuni. Heimasíðan er grundað á ein dátugrunn snikkaður til endamálið. Dáturgrunnurin er fóðraður við dómaraseðlunum í nøkrum útvaldum kappingum hjá FSF, umframt at aðrar keldur eru brúktar til serliga altjóða dystirnar.

Í fyrsta umfari eru flestu kappingarnar lisnir inn aftur til 1991, partvíst tí at hetta tíðarskeiðið fevnir um so at siga allar (íðkandi) leikarar í dag, men einamest tí, at dómaraseðlarnir frá áðrenn 1991 ikki eru nóg góðir til hagtalsskráseting. Men FaroeSoccer ætlar sjálvandi longur aftur í tíðina at skráseta, umframt at síðan skal vera dagførd alla tíðina - til tíðina!

Nøkur ting eru ikki komin við enn á dagsins FaroeSoccer, men hesi tingini eru longu innlisin og klár í dátugrunninum. Tey eru m.a. Evropa Cup dystirnir, landsdystirnir og partvíst dómararnir. Nøkur menupunktir afturat mangla eisini, eitt nú Feløg og Vøllir. Hesi tingini hava øll høga raðfesting, uttan at vit tó vilja seta nakran dag á. Vit kunna sjálvsagt leypandi um, hvat hendir her á FaroeSoccer. 

Annars kunnu vit viðmæla øllum áhugaðum og forvitnum at lesa meira um FaroeSoccer og ætlanir okkara undir YMISKT í høvuðsvalmyndini í erva.

Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018