Uppflytingin at kalla avgreidd

Støðan í 1. deild talar sítt týðiliga mál: tað verður TB, 07 Vestur ella KÍ sum flyta upp í bestu deildina komandi ár. Spurningurin er bara, hvussu nógv eykaliðini hjá hinum feløgunum klára at arga hesar trý liðini á leiðini. FC Hoyvík er á pappírinum fjórða liðið, sum kann ella hevur loyvi flyta upp, men hetta tykist sera ósannlíkt í løtuni. Hoyvíkingar skulu at síggja til bara samla seg púrasta um at verða verandi í 1. deild.

Hvat hendir í FC Hoyvík?
Í fjør fekk FC Hoyvík eina kanónbyrjan uppá kappingarárið, og eina tíð varð seriøst prátað um hoyvíkingar sum tilfar til Vodafonedeildina. Men so kom brádliga stíður í, og endin var, at FC Hoyvík við eymk og fret slapp sær undan niðurflyting(!).

Meðan FC Hoyvík enn var topplið í 1. deild í fjør vildu óndar tungur vera við, at nevndin í felagnum hevði “kreppufund” um støðuna, tí felagið sum heild var als ikki klárt til Vodafonefótbólt. Vísandi til omanfyri – um tað altso passar – var hetta altso ein heilt ógrundaður ótti!

Ringa gongdin hjá FC Hoyvík hevur hildið fram í ár. Liðið liggur tungt á 7. plássi í niðurflytingarvanda, og hevur bert vunnið tann eina dystin  í 10 royndum. Felagið tykist hava ov lítið bakland, so umsitingarliga liggur alt ov nógv á nøkrum heilt fáum herðum. Stór útskifting hevur verið og er framvegis á 1. lið, og tað hjálpir neyvan upp á gongdina.  At 2. lið hinvegin klárar seg serstakliga væl í 2. deild man vera lítil troyst hjá felagnum í hesum døgum.

Havnafeløgini hava ringastu venjingarumstøðurnar í landinum, tá hugsað verður um avmarkaða tímatalið, og smáu feløgini í Gundadali eru enn verri stillaði enn tey bæði stóru, HB og B36. Tað sigur seg sjálvt, at eitt felag sum FC Hoyvík hevur ring gróðrarlíkindir undir verandi umstøðum.

FC Hoyvík hevur ambitiónir um at koma niðan í Hoyvík – tað var m.a. tí teir skiftu navn frá Fram til FC Hoyvík. Hugskotið var gott og framsíggið, tí grundarlag er avgjørt fyri einum felag í Hoyvík. Trupulleikin er bara, at eingin vøllur er haruppi enn, og áðrenn hesin kemur fer FC Hoyvík at hava tað trupult niðri í Gundadali.


Hoyvíkingar skulu allarhelst brynja seg við (meira) tolið og venja seg við tankan um niðaravøll sum heimavøll eina tíð enn.

Vøllurin kemur, sigur varaborgarstjórin
Í einari stuttari viðtalu við FaroeSoccer sigur Bogi Andreasen, varaborgarstjóri og formaður í byggi- og býarskipanarnevndini,  at vøllurin í Hoyvík er ein ítøkilig ætlan, og at hann enn er ein partur av politisku prosessini í býráðnum. – Tað kann henda nakað í ár, og tað kann henda nakað um 2-3 ár, tað er ógvuliga trupult at siga sum er, sigur Bogi, uttan iva við truplu fíggjartíðunum í løtuni í huga.

– Býráðið hevur raðfest aðrar ítróttargreinir seinastu árini, men tað er trupult at at halda fótbóltin púra uttanfyri, tí trýstið á vøllirnar í Havn er so ovurhonds stórt, sigur Bogi. Varaborgarstjórin er sjálvur búsitandi í Hoyvík, og tað er einki loyndarmál, at hann hevur nógvar og stórar ætlanir fyri Hoyvík.

Á pappírinum er ætlaði vøllurin enn sum áður plaseraður beint við síðuna av nýggja skúlanum við Løgmannabreyt. – Tað hava verið røddir frammi um at flyta vøllin longur oman í Dalin Langa, men hetta ber ikki til, tí har er ov lítið pláss, og økið er undir øllum umstøðum lagt út sum fríøkið, sigur Bogi. – At leggja ein vøll har, hevði eisini verið at snýtt onnur, sum hava bygt haruppi við fríøkinum sum eini fyritreyt, sigur Bogi.

Spurdur um aðrar vøllir í Havn, og kanska serliga graslíki á Tórsvøll í sambandi við venjingartíðirnar generelt í Gundadali, sigur Bogi, at kommunan sum eigari av Tórsvølli er á hesum málinum og bíðar eftir eini greiðari útmelding frá FSF, hvørjar ætlanir tey hava við vøllinum, síðani verður tað tikið harfrá.

Varaborgarstjórin sigur tað ikki beinleiðis, men tað liggur líkasum í luftini, at málini viðvíkjandi graslíki á Tórsvøll og nýggjum vølli í Hoyvík kunnu ávirka hvørt annað – í hvussu so er meðan fíggjarútlitini eru so ivasom, sum tey eru nú. Báðar ætlaninar kosta nógvar milliónir krónur, so tað kann lætt gerast til ein spurningur um raðfesting hjá býráðnum.

Men enn kunnu FC Hoyvík og hoyvíkingar yvirhøvur so liva í vónini...