FaroeSoccer og fótbóltskortini

Hetta er greinin ella tíðindaskrivið, sum stóð at lesa á MESS fyrr í vikuni:

Í mong ár hevur tú haft møguleikan at keypa fótbóltskort av leikarum úr teimum stóru kappingunum í heiminum. Í næstu viku fært tú fyri fyrstu ferð nakrantíð høvið at ogna tær fótbóltskort av leikarum úr heimligu kappingini

Íalt 177 leikarar úr teimum tíggju feløgunum í Vodafone-deildini og KÍ og 07 Vestur, sum leika í 1. deild, kunnu savnast. Umframt at vera savningarkort eru faktaupplýsingar um fótbóltskarrieruna hjá hvørjum einstakum leikara. 

So ivast tú í, hvussu nógv mál Jákup á Borg veruliga hevur skorað í bestu deildini í Føroyum, ella hvussu ofta Hans Pauli Samuelsen er blivin útskiftur, ella nær Súni Olsen leikti sín fyrst dyst í bestu deildini í Føroyum, so eru hesir og fleiri aðrir upplýsingar á nýggju fótbóltskortunum, sum MESS gevur út í komandi viku. 

Umframt mynd og faktaupplýsingar av hvørjum einstakum spælara, eru tøl fyri, hvussu góður MESS metir leikararnar at vera. Upplýst er eisini, hvar á vøllinum leikarin dámar best at spæla, og hvørjum felagi hann spælir við.

Men allir leikarir eru ikki eins góðir, og tí eru eisini nakrir stjørnuleikarar. Hvørt lið hevur ein stjørnuleikara (gull), og eitt stjørnuskot (silvur).
----



FaroeSoccer hevur samstarvað og leverað til MESS í sambandi við fótbóltskortini. Vit hava latið hagtølini um leikararnar, sum eru at finna á baksíðunum á kortunum. Á kortunum verður upplýst, at hagtølini eru frá tíðarskeiðnum 1991-2009. Hetta hóast vit væl vita, at nakrir heilt fáir leikarar - teir kunnu teljast á einari hond - hava leikað nakrar dystir í bestu deuldini áðrenn 1991. 

Kanska - og vónandi - er FaroeSoccer komið eitt vet víðari í skrásetingini av leikarunum, so tá fótbóltskortini koma á marknaðin næstu ferð, skuldi alt verið 100 prosent, harímillum eisini allir altjóða dystir fyri feløg og landslið.

FaroeSoccer vónar eins og MESS, at fótbóltskortini fara at verða væl móttikin - eisini hóast HM í fótbólti i løtuni er ein stórur kappingarneyti!