Espa�ol English F�royskt

Uppflytari rennur undan

mánadagur 10. mai 2010
Nú fimm umfør eru farin afturum í 2. deild hjá monnum hevur uppflytarin, FC Hoyvík, tikið tey flestu á bóli við sínum suverena oddasessi. Trý lið eru framvegis ósigraði í triðbestu deildini.

FC Hoyvík, ið saman við FC Suðuroy flutti upp úr 3. deild í fjør, hevur fingið eina sera góða byrjan uppá kappingarárið. Teir hava vunnið 4 av 5 dystum higartil og ognað sær 13 stig. Nakað aftanfyri við 9 stigum koma B36 og 07 Vestur.

Í vikuskiftinum spældi oddaliðið FC Hoyvík í Miðvági móti botnliðnum MB. Dysturin var javnur við nógvum málmøguleikum, serliga til FC Hoyvík. FC Hoyvík legði seg á odda tíðliga í dystinum við máli frá leikandi venjaranum, Jan Laursen. Miðvingar svaraðu tó skjótt aftur við máli frá Inga W. Joensen. Í seinna hálvleiki hildu hoyvíkingar seg hava fingið mál, tá ið hornaspark bleiv skotið beinleiðis í málið, men hóast málverjin stóð langt innfyri og bjargaði, so bleiv málið ikki viðurkent. Í næsta álopinum løgdu miðvingar seg á odda, aftur við máli frá Inga W. Joensen. Ingi er ein av fáum, sum kennast aftur frá liðnum í fjør.

Eftir leiðslumálið hjá MB royndi FC Hoyvík at leggja trýst á málið hjá miðvingum. Hetta gav úrslit stutt áðrenn dystarlok, tá veteranurin, John Eystberg, javnaði til endaliga úrslitið 2-2. Í yvirtíðini hevði FC Hoyvík ein gyltan møguleika at vinna teirra fimta dyst á rað, men skotið frá einum fríum spælara úr 5-metrum rakti beint á málverjan. 

Spennandi verður at fylgja gongdini hjá nýggja felagnum FC Hoyvík, sum hevur lið bæði í 1. og 2. deild. Samlaði hópurin er samansettur av leikarum, sum undir einum kunnu fáa sama heiti sum á sending í ÚF á sinni - nýtt og gott gamalt. 

Støðið kundi verið hægri
Í 2. deild hjá monnum eru næstbestu liðini hjá sjey feløgum, FC Hoyvík, B36, ÍF, 07 Vestur, KÍ, TB og FC Suðuroy, bestu liðini hjá Skála og MB, umframt triðbesta liðið hjá Víkingi. Hendan blandingin av liðum leggur upp til, at tað er í hesi deildini, at ein triðingur av liðunum í teimum báðu ovastu deildunum skulu geva sínum eykaleikarum dystarvenjing. 

Hetta tykist tó sera trupult, tí 2. deild spælir nú leygardag í mun til sunnudag árini frammanundan. Eykaleikarar hjá B36, FC Suðuroy og ÍF, sum spæla flestu dystir sínar í Vodafonedeildini sunnudagar, fáa tí lítla og onga dystarvenjing.

Sama er galdandi fyri eykaleikarar í 1. deild hjá FC Hoyvík, 07 Vestur, KÍ og TB, tí bestu og næstbestu liðini sjáldan spæla sama stað. 

Hetta merkir, at støðið í 2. deild ikki er so høgt, sum ynskiligt er, og tí heldur ikki er nøkur avbjóðing fyri leikarar, sum hoyra til hóparnar í Vodafone- og 1. deild, men sum fáa møguleikan at spæla í 2. deild. Tá hetta er sagt, so skal ikki takast frá teimum, ið spæla í 2. deild, at teir leggja nógv fyri, tá ið spælt verður.

Úrslitini í 2. deild hetta vikuskiftið vóru: 

KÍ - TB  2-2
Skála - Víkingur  11-0
ÍF - 07 Vestur  1-4
FC Suðuroy - B36  2-2
MB - FC Hoyvík  2-2 

FC Hoyvík 2. deild 9. mai 2010
Oddaliðið í 2. deild, FC Hoyvík, avmyndað innan dystin móti MB í Miðvági leygardagin. Hendan dagin vóru teir bara 12 mans. Aftast f.v.: Finnbogi Olsen, Rúni Juul, Jan M. Laursen (venjari), Símun Christian Olsen, Brian Jensen og John Eystberg. Fremst f.v. Jónleivur Joensen, Jan í Giljum, Leivur Simonsen, Gisli Sveinbjørnsson, Jón Samuelsen og Andreas Joensen Dahl.
  
JOEY

 

Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019