Español English Føroyskt

Toppurin byrjar at líkjast

sunnudagur 9. mai 2010
Aftaná seks umfør í 1. deild hjá monnum byrjar toppurin so smátt at líkjast tí, ið var væntað undan kappingarbyrjan. KÍ meldaði seg inn í uppflytingardystin við týðandi sigri á 07 Vestur.

Í ár eru bara fýra lið, sum hava møguleika at flyta upp úr 1. deild í Vodafonedeildina: 07 Vestur, TB, KÍ og FC Hoyvík. Men í teoriini hava hini seks liðini í 1. deild: HB, B68, AB, Víkingur, NSÍ og EB/Streymur eisini kjans at "flyta upp", um okkurt av somu Vodafoneliðunum flytir niður.

Um okkurt av liðunum, ið enda sum nr. 1 og 2 í 1. deild eru umboðaði í Vodafonedeildini longu frammanundan, so fær nr. 3 kjansin, meðan lægri plaseringar ikki geva hendan møguleikan.

Kappingin er sjálvandi ung enn, men um núverandi gongd skal takast sum grundarlag fyri uppflytingarstríðnum, so verður tað helst millum 07 Vestur, TB og KÍ. Fjórði kandidaturin, FC Hoyvík, hevur fingið eina vána byrjan uppá kappingarárið og skal longu nú ansa sær ikki at missa nógv "óneyðug" stig afturat.

Í fjør vóru HB og B68 leingi við í oddastríðnum um medaljurnar, og HB endaði bara 2 stig aftanfyri TB á 3. plássinum. HB hevur aftur hug at blanda seg í toppin í ár við síni ungu manning, meðan B68, sum hevur mist nógv fólk í ár, hinvegin liggur tungt á aftasta plássinum.

Báðir uppflytararnir í 1. deild, AB og EB/Streymur, hava kanska eitt sindur óvæntað staðið seg væl higartil, og bæði eru omanfyri niðurflytingarstrikuna.

Toppskorarin í 1. deild er skjótt 42-ára gamli Jens Erik Rasmussen við sínum 6 málum, í miðal eitt mál pr. dyst. Flott hagtøl fyri veteranin og liðskiparan hjá 07 Vestur, men kanska eisini eitt sindur sigandi fyri kvalitetin í 1. deild í ár, sum higartil ikki hevur fingið áskoðararnar upp úr setrinum.

HB-B68 1. deild menn 9. mai 2010
Í góðveðrinum í Gundadali leygardagin í dystinum HB - B68 í 1. deild skrásetti dómarin 75 áskoðarar + ein veðr! 
 
  

Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018