Kvinnufótbólturin egna heimasíðu

Bara tveir dagar áðrenn síðan hjá FaroeSoccer í allari friðarligheit alment var løgd á netið tann søguliga dagin 9. apríl, sá ein spildurnýggj føroysk heimasíða www.kvinnufotbolt.com dagsins ljós á fyrsta sinni.

Tað er - ikki heilt óvæntað - navnframi teldusnillingurin og liðskiparin hjá KÍ og landsliðnum,  Malena Jospehsen, sum stendur fyri hesi forvitnisligu síðuni, og tað er eisini Malena sjálv, sum hevur forritað og skrivað at kalla alt tilfarið á síðuni umframt tikið myndirnar.

Sum heitið á síðuni ber boð um, so er hetta ein síða um kvinnufótbólt burturav - og serliga um føroyskan kvinnufótbólt, men onkrar greinar um útlendskan kvinnufótbólt eru eisini á síðuni. Tað er tó tann føroyski parturin sum vigar mest, og sum er hin mest áhugaverdi sæð við føroyskum brillum. Umframt kvinnulandsliðið og bestu deildina skrivar Malena - sum hevur onkran afturat sær at skriva - eisini um 2. deild og yngru genturnar.

Hagtølini  fáa sum heild góða rúmd, og tað er at frøast um og gevur síðuni meira tyngd. Og annars kann man altíð brúka FaroeSoccer sum back-up :-)

Malena hevur annars havt sína egnu KÍ-kvinnusíðu nøkur ár, men er nú at kalla givin við henni fyri at brúka alla orkuna uppá kvinnufotbolt.com. Umframt hesar báðar nevndu fótbóltssíðurnar hevur Malena eisini mangan verið góð hjá KÍ at heitt á - og er tað allarhelst enn - í sambandi við almennu KÍ-heimasíðuna og mangt annað.

FaroeSoccer fegnast um enn eina originala føroyska fótbóltssíðu og vónar, at Malena (og hjálparfólk hennara) fara at verða drúgv á netinum, tí fótbóltsføroyar og føroyski kvinnufótbólturin hava avgjørt brúk fyri eini tílíkari síðu. Men einki kemur av sær sjálvum, so tað er at vóna, at serliga kvinnuleikarar - núverandi og fyrrverandi - og fólk yvirhøvur við áhuga fyri føroyskum kvinnufótbólti taka væl undir við hesi síðuni.

Tað skal eisini nevnast, at Malena hevur verið - og er framvegis - ein sera góður samstarvsfelagið hjá FaroeSoccer, eitt framúr umboð fyri KÍ og føroyskan kvinnufótbólt, sum vit kundu ynskt okkum fleiri av. FaroeSoccer ynskir Malenu hjartaliga tllukku og blíðan byr við kvinnufotbolt.com og vónar framhaldandi gott samstarv.

FaroeSoccer skrásetir kvinnufótbóltin í eins stórum álvara sum mannfólkafótbóltin - tí vit spæla saman!


Malena Josephsen og hinar KÍ-kvinnurnar tykjast stevna beint móti 11. meistaraheitinum á rað!  Her ein mynd frá 2007 (mynd: KÍ-kvinnur on-line).