Vangamyndir verða nú lagdar út
sunnudagur 25. apríl 2010
FaroeSoccer er so smátt byrjað at leggja myndir út av leikarum, venjarum og dómarum. Nøkur feløg og einstaklingar hava longu bjóðað seg fram at hjálpa, og vónandi verða tey enn fleiri skjótt.
Sum vit longu hava upplýst undir YMISKT og MYNDIR, so hava vit alla tíðina ætlað at vísa myndir av ymsu aktørunum, sum FaroeSoccer hevur skrásett í sínum dátugrunni. Hetta arbeiðið hava vit nú sett hol á - umenn í smáum fyri fyrst.
Í løtuni umfatar dátugrunnur okkara eini 6.000 nøvn, sum vit vóna at kunna vísa andlitið á fyrr ella seinni - og helst fyrr sjálvandi. Eini 80-100 myndir er lagdar út higartil, og komandi tíðina verður støðugt lagt afturat. Miðað verður ímóti at koma á mál við Vodafoneleikarunum fyrst, men í prinsippinum hava ALLAR myndir sama týdning og áhuga.
Tað sigur seg sjálvt, at FaroeSoccer verður nógv áhugaverdari, tá andlit kunnu setast á øll hesi fólkini, sum ríka - og hava ríkað - okkara frítíð og lív yvirhøvur. FaroeSoccer hevur longu nú gjørt avtalur við nøkur feløg og fotografar teirra um at senda okkum vangamyndir, og vónandi fara fleiri at leggast afturat í nærmastu framtíð. Men FaroeSoccer roynir eisini eftir førimuni at gera eitt uppsøkjandi arbeiði og fáa eitt sindur inn tann vegin.
Privatpersónar og aktørar sjálvir eru annars eisini sera vælkomin at senda okkum góðar andlitsmyndir av leikarum, sum eru skrásettir/nevndir á FaroeSoccer. Tað hevur (næstan) ongan týdning, hvørjum klæðum persónurin er í, bara tað er ein góð andlitsmynd. Tað er persónurin, tað snýr seg um, og ikki felagið ella feløgini, hann ella hon hevur leikað fyri.
Um tú sendir FaroeSoccer eina mynd, so send hana (helst) digitala til tpost okkara [email protected]. Vit vilja helst hava myndina óviðgjørda (tvs. ikki skornað og minkaða) og helst ikki minni enn 300-400 px breið. Spyr bara um tú ivast. Vit vilja helst eisini hava upplýst árstalið, ella nøkulunda árstalið nær hon er tikin.
Í fyrstu atløgu hevur FaroeSoccer ikki áhuga fyri actionmyndum, bert vangamyndum. Hitt fer tó nokk at koma einaferð.
Vit takka longu nú øllum tykkum, sum hava bjóðað tykkum fram at hjálpa og tykkum, sum eftir áheitan hava játtað at hjálpa, so FaroeSoccer verður eitt enn stuttligari og áhugaverdari stað at vitja.
