KÍ-kvinnurnar trumla bara víðari

8. umfar:
AB - KÍ 1-3
Víkingur - EB/Streymur 0-2
Skála - MB 7-2

Trýst her fyri at síggja fleiri hagtøl frá dystunum, yvirlit yvir støðuna, málskjúttar og kort. 

             Les meira um kvinnufótbólt á www.kvinnufotbolt.com 

Dramatikkur
Tað bleiv dramatikkur móti endanum í dystinum á Argjum. Hornaspark varð sent innfyri KÍ-málið, og dómarin dømdi brotsspark og reytt kort til KÍ-málverjan, Randi S. Wardum. Dómarin helt, at Randi gjørdi seg inn á Halltóru Joensen, tá tær trokaðust um hornsparkið.

Um sjálvt úrslitið av dystinum var kortini ikki tann stóri dramatikkurin. AB hevði bóltin nógv fyrstu løtuna, meðan KÍ lá afturi og bíðaði. Tá 22 minuttir vóru leiktir, var verjuleikari hjá AB óheppin, at senda bóltin beint fyri føturnar hjá Rannvá B. Andreasen, tá hon skuldi skjóta burtur. Rannvá takkaði fyri, rann frá verjuni og skoraði trygt til 1-0.

Tað eydnaðist tó AB at javna, tá 39. minuttir vóru leiktir. KÍ hevði fríspark, men AB-kvinnurnar fanga bóltin og fara í kontra. Halltóra verður leys í høgru síðu og leggur innfyri, har Lisa í Liða fekk prikað bóltin í málið til 1-1.

Meðan tað fyrsta málið - sum so ofta - var frá einum "gomlum" KÍ-fóti, so gjørdist 2-1 við "barnaskóm". 15-ára gamla Maria K. Thomsen rak fleiri av í vinstru síðu, trekti so innfyri og sendi tvørturum til 17-ára gomlu Unu Joensen, sum smekkaði bóltin á yvirleggjarin og niður. Hjálpardómarin dømdi bóltin inni.

Í seinna hálvleiki var leikgongdin tann sama. KÍ lá langt afturi á vøllinum, og heldur enn at leypa á valdu tær at verja sigurin heim. AB royndi harafturímóti at leika seg í gjøgnum verjuna, men hetta vísti seg trupult. Og ístaðin fyri at AB javnaði, so var tað KÍ, sum økti um støðuna, tá AB-verjuleikari fór skeiv av einari langari sending, og Rannvá gjørdist púra frí og gjørdi tað til 3-1.

Eftr málið tók KÍ seg enn longur aftur á vøllin og bundu um heilan fingur. Men í 88. minutti hendi so tað áður nevnda, at KÍ fekk málverjan útvístan, og AB fekk brotsspark. KÍ valdi at seta tveymálskjúttan Rannvá í mál, og Olga Kristina varð sett at taka brotssparkið. Olga Kristina smekkar til, men rakar á stongina, so endaliga úrslitið gjørdist 1-3.

Óvæntað úrslit í Gøtu
í Gøtu tók Víkingur ímóti EB/Streymi. Tað var Víkingur sum setti seg á dystin beinanvegin og høvdu nógvar kjansir at fáa mál, men tær mangla tó onkran, sum dugir at fáa bóltin í málið. Hálvleiksstøðan var 0-0.

Í seinna hálvleiki var leikgongdin tann sama, tað var Víkingur, sum lá meira framvið, men EB/Streymur hevði tó onkran kjansin. Tað vóru eisini tær, sum løgdu seg á odda í 78. minutti, tá EB/Streymur fær hornaspark. Mildrið Djurhuus fer út at taka, og hon ger ikki mætari enn at senda bóltin beinleiðis í netið.

Í móti endaðnum av dystinum velur Víkingur at satsa alt fyri at fáa útjavnandi málið, men í staðin er tað Ann Tóra Láadal, ið avgerð dystin fyri EB/Streym, tá hon skorar uppá ein retur frá málverjanum hjá Víkingi.


Oddrún Danielsen (v.m.) hjá Skála er við aftur, eftir at hon hevur verið uttanfyri í meira enn eitt ár við álvarsligum knæskaða (mynd: Skála-fjepparar 1.deild kvinnur á Facebook).

Skála vann stevnudystin
Stevna var á Skála um vikuiskiftið, og tí vóru allir dystir steypadystir eisini. Men gestablídnið varð bert galdandi uttanfyri vøllin. Skála sendi nevnliga miðvágsgentur heimaftur við einum 7-2 sekki.

Skála legði bragdliga fyri við málum av systrunum Fríðrún og Oddrún Danielsen í 5. og 9. minutti.  Fríðrún stútaði horna í málið, og Oddrún fekk mál við skoti úti frá. Beint eftir hetta vóru MB óhepnar at gera sjálvmál, áðrenn Kirstinbjørg Frederiksberg í 31. minutti gjørdi tað til hálvleiksstøðuna 4-0 við ein vøkrum frísparksmáli úr 20 metra fjarstøðu. Hon setti bóltin dygst uppí málhornið.

Seinni hálvleikur var knappliga byrjaður, tá Ásgerð Káradóttur økir til 5-0, tá hon gerst frí frammanfyri málið. Men so vaknar MB, og við stuttum millumbili fáa tær tvey mál. Fyrst smekkar Jenny Svabo eitt fríspark uttarlaga úr vinstru beinleiðis í mál. Og beint aftaná sleppur Miriam Akselsen leys av skálaverjuni og fær bóltin framvið málverjanum til 5-2.

Skála trýsti aftur, og tá 86 minuttir eru leiktir, endurtekur Kirstinbjørg frísparkskynstri úr nøkulunda somu støðu. Hon setur bóltin enn einaferð í kassan til 6-2. Løtu seinni slær Sólfríð Christiansen sigurin fastan, tá hon eftir trunkaspæl frammanfyri málið eigur seinasta fótin á bóltinum til endaligu støðuna 7-2.