Hjálpið okkum at skráseta neyvari

Einki kemur av sær sjálvum her í lívinum, heldur ikki allir upplýsingarnir á FaroeSoccer. Tað er tungt og tíðarkrevjandi arbeiði at koma út í hvønn krók at skráseta alt rætt.

Vit fara við hesum at heita á allar góðar kreftir - og tað nýtist ikki at vera formenn, nevndir ella álitsfólk - men bara ONKRAN, sum kennir eitt kall mótvegis sínum felag ella sínum liði (ella síni famlju ella vinum!), at fara inn á FaroeSoccer at kekka leikarahópin fyri 2010. Leikarahópurin fæst fram við at velja eina kapping (undir Kappingar) og so klikkja á eitt felag í støðuni.

Hópurin vísir allar leikarar, sum hava staðið á onkrum dómaraseðli í 2010. Í nøkrum førum eru teigarnir Pláss og Aldur tómir. Her hevði FaroeSoccer gjarna vilja fingið upplýst Pláss (á vøllinum) og føðingardagin hjá viðkomandi. 

Í onkrum førum kunnu manglandi føðingardagar merkja, at viðkomandi leikari rætt og slætt ikki er meldaður til kappingina hjá FSF, og hetta kann hava álvarsligar fylgjur fyri eitt lið, um onkur sendir kæru inn. Aganevndin hjá FSF hevur ein heilt greiðan politikk á hesum økinum - at ein leikari altíð hevur leikað í sama felag, og at hetta kann prógvast við dómaraseðlum langt aftur í tíðina hjálpir einki!

Tað kann tó meira enn so henda seg, at leikarar - serliga frá fyrr av - eru tilmeldaðir FSF við ongum føðingardagi (óskiljandi at FSF hevur tikið ímóti hesum!). Og FaroeSoccer skal enn einaferð undirstrika, at skráseting okkara hevur EINKI VIÐ SPÆLILOYVI at gera. Tað er FSF sum suverent tekur sær av hesum.  

Vit vóna at frætta frá góðum fólki, so vit fáa tett holini í 2010 serliga, men eldri info hevur í prinsippinum minst líka stóran áhuga. Skeiv nøvn og skeivir føðingardagar vilja vit eisini sera fegin frætta um enn sum áður. Ein stór tøkk til øll tykkum, sum higartil hava gjørt vart við tykkum. 

Vit fara eisini við hesum at heita á allar venjarar og dómarar um at kekka síni fakta á FaroeSoccer. Ofta er trupult at vita, hvør tekur sær av 2. deildarliðum og 1. deild kvinnum. Manglar okkur, ella er okkurt skeivt skrásett, so lat okkum vita tað skjótast tilber, so tað kann skrásetast ella rættast. 

Onkutíð vita vit ikki føðingardag, ella hvat felag onkur dómari umboðar. Her vilja vit eisini fegin frætta.

Vit spæla saman, og vit hjálpa øllum, sum hjálpa okkum!