TB heimavøll í Vági 2011?

Alternativini
Fótbóltssambandið sendi í februar skriv út til sjey feløg við fráboðan um, at vøllir teirra eru kolldømdir frá 2011 at rokna. Hesi kravboðini komu ikki óvart á fleiri av feløgunum, men boðini hava ikki tess minni skapt ristingar og aktivitet í nøkrum av feløgunum. Serliga meint rakar hetta á Sandi og á Tvøroyri og partvíst eisini í Miðvági og Sandavági.

At síggja til raka hesi boðini meinast á Tvøroyri, har tey ikki bara kunnu skifta graslíkið á verandi vølli fyri eini 3-4 mió. kr. sum flestu av hinum feløgunum. Hetta tí at bleyta undirlendið á Sevmýri snøgt sagt ikki er egnað til at hava ein vøll á, so har nytta ongar ábøtur. Hetta merkir, at her skal hugsast grundleggjandi nýtt, og tað gera tey eisini í TB!

Í stuttari viðtalu við FaroeSoccer játtar formaðurin í TB, Jóan Petur Olgarsson, at felagið hevur ein stóran ítøkiligan trupulleika, tá vit spyrja um heimavøllin hjá TB komandi ár, tí kolldømingin hjá FSF umfatar ikki bara 1. lið, men øll lið í felagnum.

– Yvirorðnað hava vit fýra møguleikar: grasvøllurin í Hvalba, vøllurin í Vági, ein nýggjan vøll á Tvøroyri ella at FSF leingir undantaksloyvi, sigur Jóan Petur. – Tað besta vildi verið, um vit kundu komið í gongd við ein nýggjan vøll longu í ár, sum kundi staðið klárur til kappingarbyrjan komandi ár, so vit sluppu undan at leika okkara dystir aðrastaðni.

– Hetta er tó neyvan heilt realistiskt, viðgongur TB-formaðurin – men um bara hol varð sett á nýggja vøllin í ár, og arbeiðið við honum var í gongd í 2011, so hann kundi verið klárur seinni í 2011 ella til 2012, so hevði møguleikin fyri einum longdum undantaksloyvi frá FSF at leika á Sevmýri møguliga verið størri, metir Jóan Petur.

– Verður ein nýggjur vøllur ikki tøkur til 2011, og kolldømingin av Sevmýri stendur við, so er spurningurin millum Hvalba og Vág, sigur Jóan Petur. ”Kroystur” eitt sindur av FaroeSoccer er lítil ivi hjá Jóan Petur um, at av hesum báðum hevði vøllurin í Vági verið frægara loysnin. – Men enn hava vit ikki tosað við hvørki Royn ella FC Suðuroy um nakað slíkt, skundar Jóan Petur sær at leggja afturat – fyrst vilja vit vita, hvussu útlitini fyri einum nýggjum vølli eru.

Og hervið eru vit komin til tann veruliga áhugaverda partin av samrøðuni við TB-formannin.


Skjótt kann hetta søguríka húsið á Sevmýri verða søga.

Nýggjur vøllur á Tvøroyri
Tað hoyrdist í fjølmiðlunum herfyri, at TB hevur ætlanir um ein spildurnýggjan vøll inni í Trongisvági nær við ítróttarhøllina. – Hetta er framvegis so, sigur Jóan Petur – og staðið sjálvt, har vøllurin ætlast at liggja, verður nevnt í Mýrunum. Hóast hetta ”mistonkiliga” heitið á staðnum, er undirlendið har ikki tað sama sum á Sevmýri, skundar Jóan Petur sær at leggja afturat.

Jóan Petur greiður frá, at TB hevur fingið gjørt eitt skitsuprojekt av einum nýggjum vølli við tilhoyrandi TB-húsið, sum samstundis er áskoðaraskýlið til eini 350 fólk. Kostnaðarmetingin er umleið 20 mió. kr. – Býráðið á Tvøroyri eigur ongar pengar til nakað, men býráðið hevur tó latið lendið til nýggjan vøll ókeypis, og tað fegnast vit sjálvsagt um og eru takksom fyri, sigur TB-formaðurin.

– TB fekk eisini bjóðað eitt annað stykkið frá kommununi longur úti enn núverandi vøllur, men vit valdu heldur at leggja hann í Trongisvági, tí her hava vit møguleika at skapa ein veruligan ítróttar- og frítíðardepil, sigur Jóan Petur og nevnir í hesum sambandi eisini fyribils parkeraðu ætlanina um eina nýggja svimjihøll – ella eitt baðiland, sum tað varð nevnt einaferð – sum skuldi vera harumleiðir. Harumframt verða umstøðurnar til bilparkering eisini munandi betri.

– Skitsuprojektið til nýggja vøllin liggur nú hjá FSF, tí vit royna at kanna møguleikarnar fyri at fáa stuðul frá UEFA til hesa stóru verkætlanina, sigur ein vónríkur Jóan Petur. FSF-umsitingin kekkar í løtuni regluverkið hjá UEFA nærri hesum viðvíkjandi skilst.

– Ætlanin skal helst fremjast í einum og ikki í fleiri stigum, sigur TB-formaðurin avgjørdur. Hetta er eitt álvarsmál fyri TB og eisini kommunu okkara sum heild, sigur Jóan Petur. – Vit hava eini 100 ungdómar, sum dagliga hava sína gongd á Sevmýri, og hvat verður av hesum øllum, um eingin vøllur er til tey?

FaroeSoccer takkar Jóan Peturi Olgarsson fyri samrøðuna og krossar fingrar fyri hesum stóru og spennandi ætlanunum hjá aldursforsetanum í føroyskum fótbólti. Vit fara at fylgja gongdini í málinum og vóna at síggja TB á einum spildurnýggjum vølli ongantíð ov skjótt.


Herumleiðir - í Trongisvági - ætlar TB, at nýggi vøllur teirra skal ligga.