Fluttir og útsettir dystir

Fótbóltssambandið hevur seinastu tíðina boðað frá ymsum broytingum í kappingini, serliga í Vodafonedeildini. 

Hetta er vorðin ein afturvendandi táttur, nú kappingin er so trong við nógvum umførum og altjóða dystum inn ímillum. Grundleggjandi er altíð keðiligt at skula flyta dystir - ein óskikkur faktiskt - men summatíðir er tað tíverri neyðugt av ymsum (aloftast ónevndum) orsøkum, og tað mugu vit so smyrja okkum við. Aðratíðir er trupult at fáa eyga á logikkin, og tað er verri enn so altíð við góðum, at feløg flyta sínar dystir.

FaroeSoccer fer ikki at grava í orsøkum til dystarflytingar, og vit upplýsa ikki (enn) um spesifikkar broytingar. Vit staðfesta tær bara og dagføra síðu okkara, so skjótt vit hava fingið boð um tær frá FSF. Kappingaryvirlitið hjá FaroeSoccer skuldi sostatt verið tað sama sum tað á heimasíðuni hjá FSF til eina og hvørja tíð.

So kann man sjálvsagt spyrja seg sjálvan, hvør logikkurin er í lítla (nógv seinkaða) bóklinginum hjá FSF, Skipan 2010, tí hesin er at kalla longu avoldaður, áðrenn, hann er í sølubúðunum. FSF skuldi heldur spart tíð og pengar við at droppa skipanini og samlað seg meira um eina ordiliga heimasíðu.

Umframt at fleiri dystir eru fluttir, so eru tað eisini tríggir dystir, sum okkum vitandi ikki eru leiktir enn. Tveir dystir eru útsettir í 2. deild hjá monnum: MB-FC Suðuroy (12. juni) og B36-07 Vestur (19. juni), og harafturat er so dysturin í bestu kvinnudeildini millum EB/Streym og Víking (27. juni) heldur ikki spældur enn. FaroeSoccer hevur einki frætt frá FSF enn, nær hesir dystir skulu leikast.

Í morgin verður so lagt til brots aftur við Vodafonedeildini, meðan hinar deildirnar njóta summarsteðgin eitt sindur afturat.