FaroeSoccer væl móttikin

Hóast vit ikki hava verið nóg raskir til at boða frá, at vit eru til, so er FaroeSoccer longu vorðin ein partur av gerandisdegnum hjá heilt nógvum fótbóltsáhugaðum kring knøttin - og mest av øllum herheima hjá okkum sjálvum sjálvsagt. Talið av vitjandi er støðugt vaksandi - and may it long continue!

Síðani dag 1 - søguliga dagin 9. apríl 2010 - hevur FaroeSoccer stútt og støðugt fingið sendandi heilsanir og viðmerkingar frá brúkarum. Herðaklapp eru sjálvsagt deilig at fáa og kennast sum ein viðurkenning av drúgva arbeiði okkara. Men konstruktivar viðmerkingar og ikki minni rættingar eru vit enn fegnari at fáa, tí hetta er við til at gera FaroeSoccer uppaftur betri fyri øll.

Í ár er FaroeSoccer so at siga tann forlongdi armurin hjá FSF, tá tað kemur til úrslitatænastu, stýring og upplýsing av støðum, málum og kortum v.m. í týdningarmestu heimligu kappingunum, so her hvílir stór ábyrgd á okkum. Feløgini, aktørarnir og onnur áhugaðu mugu kunna líta 100 prosent á tilfarið á FaroeSoccer.

Tískil er tað av størsta týdningi at frætta frá brúkarum okkara um faktuellar feilir og serstakliga um møguligar inntøppingarvillur í kappingunum í ár. Tað kann vera okkara feilur, og tað kann vera onkur feilur í sjálvum dómaraseðlinum. Vit eru jú bara menniskju øll - og serliga dómararnir :-)

Vit arbeiða alla tíðina við at betra um síðuna, hóast alt ikki endiliga er so sjónligt, sum vit fáast við. Men tað fer í nøkrum førum at taka eitt sindur av tíð at koma á mál, tí tíðin og orkan til hetta arbeiðið er avmarkað. Hetta er m.a. eisini høvuðsorsøkin til, at vit ikki gera so nógv burturúr tíðindapartinum at byrja við, sum vit annars gjarna vildu. Men hetta fer at koma. Vit vóna at brúkarar okkara fara at vísa tol og halda fram við at gera viðmerkingar til síðuna.

Hjartans tøkk til øll tykkum, ið senda góðynskir, viðmerkingar, spurningar og rættingar - keep up the good work, sum tey plaga at siga!