Sum kunnugt hevur FaroeSoccer í fyrstu syftu samla seg um at skráseta tíðarskeiðið frá 1991 til í dag.
Men hetta merkir ikki, at vit einki hava gjørt við eldra tíðarskeiðið (1942-1991), tvørturímóti, nógv tíð er eisini farin til hendan partin av verkætlanini. Ein partur av hesi prosessini er at avrita allar dómaraseðlarnar hjá FSF/ÍSF áðrenn 1991. Hesin parturin er nú er at enda komin, men her eru vit so tíverri dotnir á, at heilir tveir árgangir í nýggjari tíð mangla:
1. deild menn 1988 og 1989
2. deild menn 1988 og 1989
3. deild menn 1988 og 1989
Løgmanssteypið 1989
Hetta er sjálvsagt harmuligt og stak óheppið, serliga tí tað snýr seg um bestu deildina (1. deild) og um Løgmanssteypið. Hetta eru tey hagtølini, sum FaroeSoccer leggur størst dent á, tá farið verður afturum 1991. Aftur til 1978 eru teir flestu dómaraseðlarnir í hesum báðum kappingunum tøkir, so tað er sjálvsagt eyka erguligt, at tveir heilir árgangir tykjast at mangla.
Leitað hevur verið dúgliga hjá FSF og ÍSF, men eskjurnar við hesum seðlunum 1988 og 1989 eru ikki at uppdríva. FSF sigur seg ikki vita, hvør hevur verið nærhendis hesum seðlunum og enn minni lænt teir. Einki skrivligt lániskjal finst um nakað.
Ringir onkur klokka harúti? Hevur onkur lánt hesar seðlarnir í síni tíð í samband við okkurt research kanska? Er nakar, sum veit nakað sum helst sum okkurt tílíkt, so latið okkum/FSF endliga frætta sum skjótast. Hetta er ein ómetaligur missur í verkætlan okkara og fyri føroyskan fótbólt sum heild.