Arnbjørn hóttir Christian Høgna
mikudagur 1. september 2010
Tað mesta av árinum hevur tað sæð út sum, um málrevurin hjá NSÍ, Christian Høgni Jacobsen, fór at gerast toppskjútti í Vodafonedeildini uttan nakra kapping yvirhøvur.
Christian Høgni Jacobsen (v.m.) ella Arnbjørn Hansen, tað er spurningurin. FaroeSoccer hevur tíverri onga góða andlitsmynd av Christian Høgni í "røttu" litunum, so kanska eitt "wake up call" til NSÍ her? :-)
Tað var annars norðmaðurin hjá AB, Stig-Roar Søbstad, sum legði harðast út í ár og var á ovast á máltindinum í Vodafonedeildini nøkur av teimum fyrstu umførunum. Men so steðgaði upp hjá Stig-Roar, og liðskiparin hjá NSÍ, Christian Høgni Jacobsen, skeyt seg ovast upp á tindin og hevur hildið til har síðani uttan serliga kapping.
Men seinasta umfar í vikuskiftinum gjørdi málrevurin hjá EB/Streymi seinastu árini, Arnbjørn Hansen, eitt satt risahál móti AB við sínum 5(!) málum, so munurin upp til Christian Høgna nú bara er tað eina málið. Christian Høgni hevur 15 mál og Arnbjørn 14 mál.
Síðani tey 5 málini móti AB er Arnbjørn eisini góðskrivaður fyri eitt mál móti B71 á Sandi 16. mai, sum FaroeSoccer annars hevði skrásett Gudmund Nielsen fyri. Dómarin hevði nokk fyrst skrivað nr. 22 (Arnbjørn) fyri málið, men síðani skrivað nr. 27 (Gudmund) útyvir ella umvent, og FaroeSoccer hevur tikið tað fyri nr. 27 og gloymt at kekka nærri í skundinum, og ongin gjørdi okkum vart við hetta tá. Nú er hetta rættað sambært áheitan frá EB/Streymi.
Christian Høgni Jacobsen hevur verið toppskjútti í bestu deildini tvær ferðir fyrr: í 2005 og 2006, báðu ferðirnar við 18 málum. Í 2008 gjørdist Arnbjørn Hansen toppskjútti við sínum 20 málum, og við allari respekt fyri øllum hinum vandamiklu áleyparunum annars, so týðir alt uppá, at dysturin um gullgagguna 2010 verður ein uppgerð millum hesar báðar.
Í Føroyum er ongin, sum alment hevur ábyrgdina av máltindinum, tvs. heldur eyga við at listin er í lagi og ger av, hvør eigur tey ymsu málini, um ivamál eru, eitt nú um sjálvmál og líknandi. Hetta taka fótbóltssambondini sær vanliga av í størru kappingunum í Evropa. Hetta kann hava við sær, at máltindurin í ymsu føroysku fjølmiðlunum ikki altíð samsvarar, og tað er sjálvsagt óheppið.
FaroeSoccer heldur, at FSF skuldi verið ovasti (aktivi) myndugleiki í sambandi við ivasamar skoringar í Vodafonedeildini, so ein almenn niðurstøðu er um, hvør eigur tey ymsu (iva)málini til eina og hvørja tíð.
FaroeSoccer heldur seg sum útgangspunkt til tað, sum dómarin skrásetir, men dómarar kunnu meira enn so skráseta skeivt – og gera tað eisini – júst sum FaroeSoccer av og á, men so eru brúkarar okkara aloftast skjótir at boða frá, tíbetur.
