Hálvleikur á FaroeSoccer...

Ongum nýtist at vera nakað flogvit fyri at staðfesta, at tað ikki eru tey stóru tingini, sum eru hend við FaroeSoccer seinastu tíðina. Tíðin og orkan er enn sum áður avmarkað, tá tað bara eru tveir mans, sum reka síðuna, og serliga er so týdningarmikli forritingarparturin  tíðarkrevjandi.

Hóast summarsteðgurin eisini kom væl við hjá okkum, so merkir tað ikki, at einki hendir handan FaroeSoccer-tjøldini. Vit hava alla tíðina eyguni við síðuni og gera smáar betringar, tillagingar og rættingar. Tað er sera hugaligt leypandi at fáa viðmerkingar frá brúkarum okkara, sum kunnu gera síðuna betri og rættari.

Seinastu tíðina hava vit eisini málrættað roynt at fingið fatur á fleiri profilmyndum, so myndirnar nú munnu vera eini 500, sum eru lagdar út. Vit heita tó framvegis á feløgini og einstaklingar um at geva okkum (og tykkum sjálvum!) eina hjálpandi hond, og takk fyri tað.

Tá summarsteðgurin er av, fara vit aftur at leggja høvuðsdentin á dagføringina av teimum kappingunum, sum vit hava avtalu um við Fótbóltssambandið. Einaferð í nærmastu framtíð skulu vit eisini hava eitt prátt við FSF um møguligt framhaldandi samstarv.

FaroeSoccer heldur tó fram uttan mun til, hvørjar ætlanir FSF hevur, tí tað stendur rimmarfast, at feløg og aktørar eru sera fegin um heimasíðu okkara og brúka hana aktivt í teirra arbeiði. Hetta er sjálvsagt hugaligt at vita sær, og vit kunnu ikki annað enn staðfesta og frøast um, at vit liva upp til endamál og slogan okkara: Vit spæla saman!

Vit hava enn sum áður nógvar ætlanir við FaroeSoccer, og vónandi verður tað ikki alt ov leingi, til vit kunnu leggja allar altjóða dystirnar út, sum longu eru klárir í dátugrunni okkara. Hetta er “bara” ein spurningur um forriting, sum so mangt annað.

Hagtølini hava enn sum áður fremri raðfesting enn tíðindaparturin, men hetta ER allíkavæl nakað, vit hava við í ætlanum okkara. Væntast kann tó ikki, at nakað serligt fer at henda á hesum frontinum fyrrenn komandi kappingarár – hetta uttan at lova ov nógv.

Men vit gleða okkum til seinni kappingarhálvu og vóna, at góða samstarvið við FSF, feløgini og dómararnar fer at halda fram. Okkara partur skal so ikki liggja eftir! Ein serlig tøkk til tykkum brúkarar, sum gera vart við tykkum, tá okkurt ikki er, sum tað eigur, much appreciated.