AB og KÍ vunnu stórt
mánadagur 17. mai 2010
Hóast KÍ í løtuni deilur 1. plássið við AB, so er tendensurin hin sami: tað er KÍ og so hini. KÍ manglar í løtuni at leika tveir dystir, harav annar møguliga verður avgjørdur á skriviborðinum.
Fult umfar var í kvinnudeildini sunnudagin. AB og KÍ vunnu stórsigrar og EB/Streymur og Skála spældu javnleik.
EB/Streymur - Skála 1-1 (1-0)
KÍ - Víkingur 7-1 (5-1)
MB - AB 0-7 (0-0)
Vel Kappingar > Kvinnur > 1. deild í menubjálkanum í erva fyri at síggja fleiri hagtøl frá dystunum.
Les meira um kvinnufótbólt á www.kvinnufotbolt.com
EB/Streymur og Skála fóru av vøllinum í dag við einum máli og einum stigi í part. EB/Streymur legði seg á odda í 27. minutti, við máli sum Sólja T. Eiðisgarð gjørdi. Hendan leiðslan helt sær líka til tíggju minuttir vóru eftir av dystinum, tá tað eydnaðist Skála at javna. Málið gjørdi innskifta Ásgerð Káradóttir.
Við javnleikinum misti Skála eitt fet í toppinum, men tær liggja nú einsamallar á triðja plássinum.
Í Klaksvík tók KÍ ímóti Víkingi. Víkingur, sum stutt síðani vann 2-0 á AB, fekk ikki nógv gjørt við vælleikandi KÍ-liðið. KÍ legði seg á odda longu í 6. minutti, tá Sofía Purkhús skoraði, og 10 minuttir seinni økti sama Sofía til 2-0. Aftur 10 minuttir seinni gjørdi Malena Josephsen tað til 3-0, og nú var bara spurningur um, hvussu stórur sigurin fór at verða. KÍ-kvinnurnar fingu 2 mál afturat áðrenn hálvleik, sum Rannvá Andreasen og Sigrid gjørdu. Víkingur fekk tó ímillum har minka um munin við málið frá Súsannu Norðgerð.
Í seinna hálvleiki fekk KÍ bert tvey mál afturat, hóast tær høvdu kjansir til fleiri. Rannvá økti til 6-1 og Ása K. Thomsen gjørdi seinasta málið í dystinum, soleiðis at dysturin endaði 7-1. Bæði liðini høvdu kjansir til at gera fleiri mál, men inn í málið vildi bólturin ikki. KÍ liggur á odda í deildini við 15 stigum saman við AB, men AB hevur tó leikt tveir dystir fleiri enn KÍ. Víkingur liggur á fjórða plássi..
Seinasta vikuskiftið fekk MB ikki mannað lið, men í dag gekk betur, tá tær á heimavølli tóku ímóti AB. Tað eydnaðist MB at halda málið reint í fyrra hálvleikin, hóast AB hevði nógvar málkjansir. Í seinna hálvleiki gekk ikki so gott, tí tá lótu tær heili 7 mál í gjøgnum. Tað var serliga í teimum seinastu tíggju minuttunum, at tað gekk heilt galið hjá MB. Tá fóru heili fimm mál í gjøgnum. Olga Kristina Hansen skeyt reint hattrick, meðan Rakul Jógvansdóttir skeyt tvey mál. Doris í Garði og Barbara á Dunga gjørdu hvør sítt.
Frá dystinum KÍ-Víkingur í Klaksvík sunnudagin. Mynd: www.kvinnufotbolt.com.
