Skrivaraborðið vann aftur trygt!

Hetta varð enn einaferð staðfest í dag, tá FSF kunngjørdi ein dóm hjá Aganevndini í einum kærumáli millum Undri og Giza tann 15. mai, tá hesi leiktu ein dyst í 3. deild. Kærumálið viðv. Giza og Undri kann annars lesast her í fullum líki.

Giza kærir um tríggjar Undri-leikarar á dómaraseðlinum, sum teir meta sum ólógligar, tí teir ikki eru á leikaralistanum hjá FSF, sum finst á heimasíðuni hjá FSF; tvs. eru teir ikki tilmeldaðir, so hava teir heldur einki spæliloyvi.

Eitt upplagt mál hjá Aganevndini, sum púra rætt kveistrar vánaligu argumentini hjá Undri til viks (tey eru ofta brúkt fyrr av øðrum), og Undri verður dømt at tapa 3-0. Giza hevur fullan rætt at kæra, og so er annars bara at vóna (fyri teir), at teir hava síni egnu viðurskifti í lagi.

Spæliloyvið er galdandi niður til tey allaryngstu, so í prinsippinum er ongin munnur millum Vodafoneleikarar ella pinkur. Uttan spæliloyvi hevur tú ikki loyvi at spæla dyst undir FSF, so einkult er tað! FSF ger tó sjáldan nakað við slíkt av sínum eintingum, vanliga skal ein kæra til.

Hetta málið millum Giza og Undri er sum so ikki serliga áhugavert ella serstakt. Bara ENN eitt høvi at minna feløgini á at tilmelda ALLAR sínar leikarar, so skjótt sum teir vísa seg í felagnum fyrstu ferð. Hetta er skorið so ofta og leingi út í papp nú, at tað er løgið at summi ikki enn hava skilt henda heilt greiða boðskapin. At ein leikari altíð hevur spælt við sama felag - og at hetta kann prógvast við dómaraseðlum langt aftur í tíðina - er IKKI eitt nóg gott argument. Leikarin SKAL vera tilmeldaður, ella fangar borðið - UM altso ein kæra kemur. FSF kann eisini fara inn í mál av sínum eintingum, um illgruni er um okkurt, men hetta er sum sagt ikki vanligt.

FaroeSoccer hevur einki við spæliloyvi at gera
FaroeSoccer dettur í skráseting síni meira enn so á leikarar, sum ikki eru tilmeldaðir FSF. Hetta eru typiskt ungir leikarar, sum verða tiknir upp at spæla sín fyrsta dyst í næst- ella triðbestu deildini ella við kvinnunum. Í slíkum førum seta vit okkum vanliga í samband við felagið fyri at fáa føðingardag og pláss hjá leikaranum til okkara skráseting  og heita í sama viðfangi á felagið um at fáa hesi viðurskifti í rættlag við FSF. Hvørki FaroeSoccer ella FSF leita eftir trupulleikum, vit vilja bara hava alt at koyra so væl og so smidligt sum tilber.

FaroeSoccer skal ENN einaferð gera vart við, at leikaraskráseting okkara hevur einki við spæliloyvið hjá leikarunum at gera. FSF umsitur suverent spæliloyvini, og teirra navnalisti er ikki tann sami sum tann hjá FaroeSoccer.

FaroeSoccer fer enn einaferð INNILIGA at heita á feløgini - kanska serliga venjararnar - um at kekka, at allir leikarar, teir seta á dómaraseðilin (ella sum møta til venjing), eru tilmeldaðir FSF, tvs. at teir finnast á leikaralistanum á FSF-heimasíðuni. Um ein leikari onkursvegna ikki finst á FSF-listanum, so kekka hetta í allari friðarligheit við FSF-umsitingina. Tað kundi væl hent, at leikarin er skeivt skrásettur onkursvegna, takið bara ikki kjansin!