B71 heimavøll í Havn í 2011?

FaroeSoccer hevur havt eitt lítið prát við formannin í B71, Ragnar Fossdalsá, nú FSF hevur sent felagnum kravboð um nýtt graslíki til komandi ár, um B71 framhaldandi ynskir at leika sínar dystir Inni í Dal.

Onkur hevur – kanska mest í skemti – róð uppundir, at B71 møguliga noyðist at leika sínar heimdystir onkra aðrastaðni komandi ár, um kommunurnar í Sandoy ikki taka sær um reiggj og fíggja nýtt graslíki. Havnin hevur verið nevnd, men hetta man neyvan vera nakað, sum hóvar hvørki sandoyingum ella havnarmonnum.

- Nei, vit fara heilt sikkurt ikki til Havnar at leika okkara heimadystir, sigur Ragnar avgjørdur. – Verður nýtt graslíkið ikki lagt á verandi vøll, so verður nokk bara ongin fótbóltur her!

Hinvegin er B71-formaðurin als ikki ónøgdur við ella ófyrireikaður uppá kravboðini, sum komu frá FSF fyrr í ár. – Høvdu hesi boðini ikki komið, so var heilt sikkurt einki gjørt við vøllin her enn á sinni. B71 hevur fingið fleiri undantaksloyvi frá FSF seinastu árini, og man hevur bara latið staðið til her alt ov leingi. Men nú gongur tað ikki longur, nú noyðast myndugleikarnir í oynni at gera nakað ítøkiligt við málið, sigur Ragnar og ljóðar stríðsfúsur á málinum. 

Myndugleikin í hesum føri er fyrst og fremst Sandoyar Skúlasamband, sum varðar av vøllinum og meginskúlanum vegna kommunurnar í oynni. Nevndin í Skúlasambandinum er samansett av politikarum úr øllum kommununum í oynni, og í løtuni er Gerhard Lognberg formaður.

Í verandi løtu liggur skrivið frá FSF til B71 hjá í Skúlasambandinum. Har er tað ikki viðgjørt enn, men Ragnar vónar at fáa ein fund í lag við nevndina í Skúlasambandinum áðrenn summarfríðina, so B71 fær eina hóming av, hvar felagið flýtur í hesum álvarsmálinum. Hesin fundurin skal so ætlandi vera innan 2-3 vikur.

- Hóast núverandi graslíki gongur á 22. ári, so hava vit roynt at gjørt ábøtur á vøllin seinastu árini, sigur Ragnar. Eitt nú eru linjurnar skiftar út og pjøssað er eisini um mest slitnu støðini. Men hetta kostar nógv og er ikki nøkur varandi loysn. Vøllurin er púra niðurslitin nú og má skiftast, so einkult er tað!

Ragnar er jaligur, tá hann verður spurdur um kostnaðin av einum nýggjum vølli. Hann metir, at nýggja graslíkið møguliga kann fáast fyri umleið 2 mió kr, um væl vil til. Hetta metir FaroeSoccer tó vera í so optimistiskt, tá hugsað verður um, at vøllurin á Argjum nú verður skiftur fyri gott 2,5 mió kr., og har skal bara sjálvt graslíkið skiftast, ikki undirlagið. Á Sandi má vøllurin eisini breiðkast eitt sindur – allarhelst á báðum síðum, umframt at nýggj gyrðing skal gerast.

Samband hevur verið millum B71 og møguligar graslíkisveitarar ella umboð teirra í Føroyum – teir eru fleiri – og sum skilst, so er tað tað nýggjasta nýggja, sum man tosar um. Kvaliteturin gerst alsamt betri, og ein slíkur vøllur til B71 – har trýstið á vøllinum ikki er so stórt sum t.d. í Havn – kann allarhelst halda eini 10 ár uttan at verða skiftur, sigur ein umboðsmaður, sum FaroeSoccer hevur tosað við.

Í sambandi við møguliga fígging gloppar B71-formaðurin fyri møguleikanum at søkja UEFA um stuðul til ein part av samlaða kostnaðinum. – Vit hava hoyrt jalig signal harfrá, so tað er ikki óhugsandi, at vit kanska kundu fingið t.d. 1/3 harfrá, sigur ein vónríkur Ragnar.

FaroeSoccer takkar Ragnari fyri samrøðuna fer at ynskja honum og B71 bestu eydnu við stríðnum fyri nýggjum graslíki. Ongin iva skal vera um, at sandoyingar – allir B71arar – eru minst líka so troyttir av vánaliga vøllinum Inni í Dal, sum øll tey vitjandi fótbóltsliðini. Og sandoyingar noyðast enntá eisini at venja á hesum (vandamikla) undirlagnum!

Her eru nøkur link til virkir, ið fáast við graslíkisvøllir, sum bjóða seg fram í Føroyum:
www.polytan.com
www.greenfields.eu
www.domosportsgrass.com
www.iogsaltex.co.uk


Nei, liðskiparin hjá B71, Símun Hansen, og hansara menn fara neyvan at deila heimavøll við Milan Kuljic og hinar HBarnar í Gundadali. Her ein mynd frá dystinum á Sandi 13. mai. Mynd: Jan Otto Holm/www.hb.fo.